Për zjarrin i cili kishte kapluar sot në mesditë një objekt të kazermës së Forcës së Sigurisë së Kosovës në afërsi të Istogut, kanë dhënë detaje edhe FSK-ja.
“Sot rreth orës 11:30 në Kazermën “Ushtarët e NATO-s” në Istog, ka shpërthyer një zjarr në një nga objektet montazh, të trashëguara nga KFOR-i, Spanjoll, të ndërtuara pas luftës në Kosovë”, njofton FSK.
Më tej tregohet se përhapja e zjarrit është bërë shpejt për shkak të materialit lehtë të ndezshëm dhe vjetërsisë së objektit. Reagimi ishte i menjëhershëm nga ekipe të FSK-së, dhe të zjarrfikësve nga komunat Istog, Klinë dhe Pejë ku dhe kanë arritur të lokalizojnë zjarrin për të mos u përhapur në objektet tjera afër, dhe pas disa orësh zjarri është shuar plotësisht.
FSK-ja njofton se lëndime në personel nuk ka, përveç dëmeve materiale, dhe për shkaktarët që quan deri te zjarri do të merren ekspertët kompetentë.
