Lëvizja Vetëvendosje ka reaguar në lidhje me shtrenjtimin e biletave të trafikut urban në Prishtinë.
Sipas degës së VV-së në Prishtinë vendimi për rritjen e çmimit të biletës së transportit urban është dëshmi se qeverisja e PDK-së dhe LDK-së në Prishtinë ka zgjedhur t’ua kalojë qytetarëve koston e dështimeve të veta.
“Pas pesë vitesh qeverisje, bilanci është i qartë: asnjë autobus i ri për Trafikun Urban, asnjë përmirësim i kushteve për udhëtarët, asnjë rritje e cilësisë së shërbimeve. Në vend të investimeve dhe reformave, qytetarëve u servohet vetëm një biletë më e shtrenjtë. PDK dhe LDK kërkuan besimin e qytetarëve duke premtuar zgjidhje për trafikun dhe transportin publik. Uran Ismaili, partneri kujdestar i Përparim Ramës, premtonte transport publik falas. Sot, me PDK-në në pushtet, qytetarët nuk marrin transport falas, por një biletë dy herë më të shtrenjtë. Kjo tregon se për PDK-në dhe LDK-në, premtimet zgjasin vetëm deri në ditën e zgjedhjeve. Pas zgjedhjeve, qytetarët përballen me tarifa më të larta, ndërsa Kryeqyteti vazhdon të ketë të njëjtat probleme: mungesë autobusësh, shërbim të pamjaftueshëm, pritje të gjata dhe mungesë vizioni për zhvillimin e transportit publik”, shkruhet në reagimin Lëvizjes Vetëvendosje të mërkurën.
Tutje në reagim shkruhet se ky vendim është marrë pa asnjë analizë të qartë, pa asnjë logjikë ekonomike dhe pa asnjë vizion zhvillimor.
“Prandaj, ne e kundërshtojmë këtë vendim dhe kërkojmë nga ekzekutivi i Kryeqytetit ta tërheqë menjëherë”.
“Prishtina nuk ka nevojë për bileta më të shtrenjta. Ka nevojë për më shumë autobusë, transport publik më efikas, shërbime më cilësore dhe një vizion të qartë për mobilitetin urban. Mbi të gjitha, ka nevojë për një qeverisje që i mban premtimet që u jep qytetarëve”, përfundon reagimi i VV-së.
Komuna e Prishtinë ka vendosur t’i shtrenjtojë biletat e transportit publik, vendim ky i cili do të hyjë në fuqi nga dita e sotme.
Çmimi i biletës njëdrejtimëshe nga 50 sa ka qenë, tash do të jetë 80 centë.
Por, qytetarët mund të paguajnë më pak, vetëm 60 centë, nëse bileta paguhet përmes sistemit digjital.
