Ish-komandanti i Ushtrisë Çlirimtare të Kosovës për Zonën e Llapit, Fatmir Sopi ka dëshmuar para Dhomave të Specializuara në Hagë, në rastin ndaj Hashim Thaçit, Kadri Veselit, Jakup Krasniqit e Rexhep Selimit.
Fillimisht, Prokuroria bëri një përmbledhje të rolit të Sopit gjatë luftës së fundit në Kosovë.
“Fatmir Sopi u kyç në UÇK në fillim të 98-tës, ai ka qenë i angazhuar në organizimin e strukturave të UÇK-së në regjionin e Gollakut, brenda Zonës operative të Llapit dhe ka qenë person i rëndësishëm në krijimin e Brigadës 163, Fehmi Lladrovci. Në shkurt 1999 u emërua si komandant i Brigadës 153, përgjegjës për mbrojtjen e civilëve. Sopi jep informacione lidhur me krijimin, strukturën stërvitjen dhe operacionet e Brigadës 153, njësive të tjera të UÇK-së që operonin në atë zonë përfshirë BIA-në, vijat e raportimit në Zonën Operative të Llapit dhe vendndodhjet e UÇK-së në atë rajon”, tha prokurori, Cezary Mihailzcuk.
Më pas Sopi u pyet për një vizitë të Jakup Krasniqit gjatë luftës në Zonën Operative të Llapit, për të cilin foli me emocione.
“Është e vërtetë që është Jakup Krasniqi dhe nuk do të doja kurrë ta shihja në këtë sallë dhe në këtë gjendje. Kjo çka pash më ngjall emocione sepse ma kujton zëdhënësin e UÇK-së, njeriun i cili i jepte zë dhe i jepte shpirt dhe zemër çdo luftëtari në luftën tonë çlirimtare, të nderuarin Jakup Krasniqi”, tha Sopi duke iu përigjur pyetjeve të prokurorisë.
Tutje Sopi që është dëshmitari i 98-të i Prokurorisë në rastin ndaj ish-krerëve të UÇK-së u pyet për rolin e UÇK-së, për të cilën tha se “Ushtria Çlirimtare e Kosovës ishte një ushtri vullnetare, burimin e kishte në popull dhe ishte si rezultat i vuajtjeve shekullore të popullit tonë nën robëri dhe se Ushtria Çlirimtare e Kosovës është projekti më i madh i shqiptarëve pas shpalljes së pavarësisë së Shqipërisë”.
Ai po ashtu komentoi lidhjet e LDK-së me UÇK-në.
“Kohën kur kam vepruar unë, nuk ka pas asnjë përçarje politike dhe nuk ka pas asnjë politikë përpos luftës çlirimtare dhe nuk ka pasur asnjë mosmarrëveshje politike në mes të radhëve të Ushtrisë Çlirimtare të Kosovës”, shtoi ai.
Sopi po ashtu tha se vazhdon të jetë kryetar i Organizatës së Veteranëve të luftës së UÇK-së, dega në Prishtinë.
Me këtë Sopi, përfundoi dëshminë e tij para gjykatës në Hagë./rtk
