Trupi Gjykues ka konstatuar se Hashim Thaçi dha kontribut të qenësishëm në zbatimin e qëllimit të përbashkët kriminal dhe se ishte anëtar kyç në formulimin dhe zbatimin e tij.
Sipas gjykatësit Charles Smith, Thaçi, si anëtar i Shtabit të Përgjithshëm dhe i Drejtorisë Politike të UÇK-së, kishte rol të rëndësishëm në vendimmarrjen politike dhe në strukturat e organizatës.
Sipas Trupit Gjykues, Drejtoria Politike kishte kompetencë pothuajse ekskluzive mbi vendimet politike të UÇK-së, ndërsa Thaçi e shprehu publikisht vizionin politik të saj. Gjykata tha se në këtë përfshihej edhe shënjestrimi i personave të konsideruar kolaboracionistë, krijimi i strukturave dhe rregulloreve për këtë qëllim, si dhe përdorimi i luftës speciale dhe komunikatave publike kundër kundërshtarëve.
Trupi Gjykues ka thënë se Thaçi, së bashku me të akuzuarit e tjerë, emëroi persona besnikë në pozita kyçe komanduese, me qëllim të ruajtjes së kontrollit mbi UÇK-në dhe sigurimit të zbatimit të urdhrave në nivelet më të ulëta të hierarkisë.
“Thaçi mori pjesë dhe inkurajoi kryerjen e krimeve në mënyra të ndryshme. Përmes deklaratave dhe komunikatave, si dhe përdorimit të luftës speciale, Thaçi shprehu tolerancë dhe inkurajim për kryerjen e krimeve kundër kundërshtarëve”, ka thënë trupi gjykues.
Sipas gjykatës, Thaçi mori pjesë personalisht në disa prej krimeve, përfshirë arrestimin, ndalimin dhe marrjen në pyetje të 13 parlamentarëve në Qirez dhe Bajicë, si dhe arrestimin, ndalimin dhe vrasjen e paligjshme të Behajdin Hallaqit.
“Ai kishte dijeni edhe për arrestimin dhe ndalimin e disa personave të tjerë”, ka deklaruar Trupi Gjykues.
Gjykata ka konstatuar gjithashtu se Thaçi kishte dijeni për një numër të konsiderueshëm krimesh ndaj personave të konsideruar kundërshtarë dhe se, sipas konstatimeve të saj, nuk ndërmori hapa për parandalimin apo ndëshkimin e tyre.
