Ushtria izraelite ka vrarë të paktën 212 gazetarë palestinezë në Rripin e Gazës që nga fillimi i luftës së saj gjenocidale në tetor të vitit 2023, transmeton Anadolu.
Zyra për media e qeverisë në Gaza tha se numri i gazetarëve të vrarë në Gaza është rritur në 212, me viktimën e fundit, gazetarin Saeed Abu Hassanein, i cili humbi jetën nga plagët e marra në një sulm ajror izraelit në Khan Younis në jug të Gazës.
Abu Hassanein ishte një gazetar që punonte në radion lokale Al-Aqsa.
Zyra për media e qeverisë në Gaza dënoi fuqishëm shënjestrimin sistematik izraelit të gazetarëve, duke i kërkuar Federatës Ndërkombëtare të Gazetarëve, Unionit të Gazetarëve Arabë dhe të gjitha organizatave të medias në mbarë botën të dënojnë krimet izraelite dhe t’i ndjekin penalisht para gjykatave ndërkombëtare.
Më 18 mars, ushtria izraelite rifilloi sulmet në Gaza, duke thyer një armëpushim dhe marrëveshjen e shkëmbimit të të burgosurve që hyri në fuqi më 19 janar.
Izraeli ka vrarë më shumë se 51.400 palestinezë në enklavë që nga tetori i vitit 2023, shumica prej tyre gra dhe fëmijë.
Nëntorin e vitit të kaluar, Gjykata Ndërkombëtare Penale lëshoi urdhër-arreste ndaj kryeministrit izraelit, Benjamin Netanyahun dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza. Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën në enklavë.
