Ministria e Bujqësisë, Pylltarisë dhe Zhvillimit Rural (MBPZhR) ka njoftuar se është zgjatur edhe për 10 ditë afati për aplikim në Programin e Pagesave Direkte 2026, transmeton KosovaPost.
Sipas njoftimit të MBPZhR-së, afati shtesë për aplikim ka filluar më 22 korrik dhe përfundon më 31 korrik 2026, në orën 16:00.
Aplikimet vazhdojnë të dorëzohen në Drejtoritë Komunale për Bujqësi në komunat përkatëse.
Programi i Pagesave Direkte 2026 është ridizajnuar në përputhje me harmonizimin gradual me Politikat e Përbashkëta Bujqësore të Bashkimit Evropian (CAP) dhe përfshin katër shtylla kryesore të mbështetjes: Pagesat Bazë për të Ardhura sipas Sipërfaqes, Pagesat Rishpërndarëse, Pagesat e Lidhura me Prodhimin dhe Cilësinë, si dhe Eko-Skemat.
MBPZhR-ja u ka bërë thirrje fermerëve që ende nuk kanë aplikuar ta shfrytëzojnë afatin shtesë dhe të dorëzojnë dokumentacionin e nevojshëm, në përputhje me kategorinë e mbështetjes për të cilën aplikojnë.
Ministria ka rikujtuar se kriteret e pranueshmërisë dhe dokumentacioni ndryshojnë sipas sektorëve dhe masave mbështetëse, ndërsa gjatë kontrolleve administrative dhe atyre në terren do të zbatohen dispozitat e Udhëzimit Administrativ Nr. 02/2026 për Pagesat Direkte në Bujqësi.
Për informata më të hollësishme rreth kritereve të pranueshmërisë, dokumentacionit dhe procedurave të aplikimit, fermerët mund t’i drejtohen MBPZhR-së, Agjencisë për Zhvillimin e Bujqësisë (AZHB) ose Drejtorive Komunale për Bujqësi.
