Për të garantuar integritetin e zgjedhjeve të sotme, Zyra e Kryeprokurorit të Shtetit ka angazhuar mbi 100 prokurorë dhe zyrtarë të sistemit prokurorial, të cilët do të monitorojnë nga afër të gjithë procesin zgjedhor në mbarë vendin, deri në përmbylljen e tij.
Prokurori i Shtetit ka bërë thirrje publike drejtuar qytetarëve, subjekteve politike dhe organizatave të shoqërisë civile që të raportojnë çdo dyshim për keqpërdorim, presion apo manipulim të votës, duke theksuar rëndësinë e ruajtjes së integritetit të procesit demokratik.
Ndërkohë, edhe Policia e Kosovës ka ndërmarrë masat e nevojshme operative dhe logjistike për mbarëvajtjen e procesit zgjedhor, duke hartuar planin operativ për zgjedhjet e parakohshme për Kuvendin e Republikës së Kosovës.
Sipas këtij plani, janë angazhuar një numër i mjaftueshëm i zyrtarëve policorë, kryesisht të rendit publik, ndërsa sipas nevojës mund të përfshihen edhe njësi të tjera të specializuara brenda Policisë së Kosovës, së bashku me pajisjet përkatëse logjistike, me qëllim garantimin e sigurisë dhe mbarëvajtjes së procesit zgjedhor.
Policia ka theksuar se synimi kryesor është krijimi i një klime të qetë dhe të sigurt për të gjithë qytetarët, si dhe ruajtja e rendit dhe sigurisë publike para, gjatë dhe pas ditës së zgjedhjeve, përfshirë rritjen e vigjilencës dhe sigurimin e qendrave të votimit, depove komunale dhe Qendrës së Numërimit dhe Rezultateve.
Në një zhvillim të ndarë, Policia e Kosovës dhe Zyra e Kryeprokurorit të Shtetit kanë bërë të ditur se një ditë më parë në Graçanicë janë arrestuar shtatë persona të dyshuar për vepra penale që lidhen me cenimin e përcaktimit të lirë të votuesve dhe ushtrimin e presionit politik.
Po ashtu, më 4 qershor 2026, në të njëjtën komunë është arrestuar edhe një person tjetër, nën dyshimin për marrje dhe dhënie ryshfeti në lidhje me procesin e votimit.
