Komuna e Prishtinës ka kontraktuar projektin për ndërtimin i sheshit “Xhorxh Bush” me vlerë 18.1 milionë euro, pavarësisht se në Ligjin e Buxhetit për periudhën 2025–2027, për këtë projekt janë paraparë vetëm 1.55 milion euro. Kjo ka bërë që Komuna e Prishtinës të hyjë në obligime shumëfish më të mëdha, pa mbulesë të mjaftueshme buxhetore.
Kjo është një nga gjetjet kryesore të raportit të performancës së publikuar nga Zyra Kombëtare e Auditimit për vitin 2025.
Një tjetër rast i evidentuar është projekti “Ndërtimi i krahut të rrugës Muharrem Fejza – Rruga Prekazi”, me vlerë rreth 394 mijë euro, për të cilin nuk ka pasur fare mjete të ndara në Ligjin e Buxhetit për vitin 2025, ndonëse projekti është kontraktuar.
Po ashtu, edhe furnizimi me automjete për nevojat e QKMF-së dhe QMU-së, në vlerë prej 176 mijë euro, është realizuar përtej mbulesës së planifikuar buxhetore, pasi në buxhetin vjetor ishin paraparë vetëm 50 mijë euro për vitin 2025.
Raporti thekson se në të tri rastet, Komuna ka hyrë në obligime kontraktuale pa siguruar paraprakisht fonde të mjaftueshme, në kundërshtim me kërkesat ligjore për menaxhimin e buxhetit dhe kufijtë e zotimeve shumëvjeçare.
Sipas raportit, situata ka ardhur si pasojë e miratimit me vonesë të buxhetit komunal për vitin 2025, çka ka bërë që disa projekte të parapara në Kornizën Afatmesme Buxhetore të mos përfshihen në Ligjin e Buxhetit të Republikës së Kosovës për këtë vit.
Megjithatë, komuna ka vazhduar me nënshkrimin e kontratave pa siguruar mbulesë të aprovuar financiare.
“Hyrja në obligime kontraktuale pa mbulesë të mjaftueshme buxhetore rrit rrezikun e vështirësive në financimin e projekteve, vonesave në realizimin e tyre, si dhe krijimit të obligimeve të papaguara ndaj operatorëve ekonomik”- shkruhet në raport.
Në fund, ZKA i ka rekomanduar Kryetarit të Komunës që para nënshkrimit të çdo kontrate shumëvjeçare të sigurohet mbulesë e plotë buxhetore e miratuar në Ligjin e Buxhetit për të gjithë periudhën e realizimit të projektit.
Nga Komuna e Prishtinës, sipas raportit, janë pajtuar me gjetjet dhe rekomandimin e auditimit.
Kjo komunë ka pranuar opinion të kualifikuar nga Auditori.
ZKA jep opinion të kualifikuar kur Pasqyrat Financiare nuk janë në përputhje të plotë me standardet.
Ky raport i ZKA-së për komunën ka rezultuar me 25 rekomandime.
Prej tyre, 14 janë rekomandime të përsëritura, 3 pjesërisht të zbatuara, 8 janë rekomandime të reja, ndërsa dy rekomandime janë zgjidhur gjatë procesit të auditimit.
Në raportin e auditimit në vitin 2024, Komuna e Prishtinës kishte marrë 27 rekomandime.
