Aleanca për Ardhmërinë e Kosovës ka paraqitur një listë kërkesash që, sipas saj, duhet të përmbushen nga Lëvizja Vetëvendosje nëse kërkon mbështetjen e saj për formimin e institucioneve të reja. Kryetari i AAK-së, Ardian Gjini, ka deklaruar se partia e tij nuk synon pjesëmarrje në qeveri, por kërkon zotime të qarta për çështje strategjike dhe ekonomike.
Në një konferencë për media, Gjini ka paralajmëruar se vendi rrezikon të përballet me zvarritje të mëtejshme të krizës institucionale, e cila sipas tij nuk i shërben as qytetarëve e as zhvillimit të shtetit.
“Fatkeqësisht po krijohet një ndjenjë që Kosova prapë rrezikon të mbetet për një kohë të gjatë pa institucione, situatë e cila nuk shkon në favor as të qytetarëve as të zhvillimit strategjik të shtetit të Kosovës. Gjithçka është peng, gjithçka është bllokuar, tashmë është bllokuar për 1 vit e gjysmë. Në këto rrethana Aleanca deklaron si vijon: Ne nuk kemi asnjë kusht vetjak, nuk synojmë asnjë pjesëmarrje në Qeverinë e Kosovës, mirëpo i kemi disa kërkesa të cilat janë jetike në mënyrë që Aleanca ta kryejë punën e vet në ndihmë të krijimit të institucioneve”, ka deklaruar Gjini.
Sipas tij, kërkesat e AAK-së përfshijnë gjashtë pika kryesore: pranimin e projektit të gazit amerikan, nisjen e termocentralit me thëngjill për pavarësi energjetike, rritjen e pragut të TVSH-së për bizneset e vogla, lirimin e tokës së punuar nga tatimi në pronë, buxhetimin e plotë të infrastrukturës jetike dhe një fond emergjent për Prishtinën.
“E para institucionet e reja duhet qartë të pranojnë orientimin strategjik, ta pranojnë projektin e gazit amerikan menjëherë. Nisja e menjëhershme e procedurave për ndërtimin e termocentralit me thëngjill, për të garantuar zhvillim ekonomik dhe ulje të inflacionit. Institucionet duhet menjëherë ta ngrisin pragun e TVSH-së nga 30 mijë në 100 mijë euro. Menjëherë tokat e punuara të lirohen nga tatimi në pronë. Kërkojmë që institucionet menjëherë t’i buxhetojnë si të plota ndërtimin e infrastrukturës jetike, si rruga për Gjilan, Pejë, Gjakovë, Podujevë, janë të buxhetuara prandaj nuk punohet. Të zotohen se për Prishtinën duhet të ndahen në 5 vjetët e ardhshme 800 milionë deri 1 miliard euro sepse po bëhet e pajetueshme”, ka thënë Gjini.
Gjini gjithashtu tha se AAK është e gatshme të kontribuojë në formimin e institucioneve, madje edhe me kuorum nëse është e nevojshme, por pa kërkuar poste qeveritare.
“Kjo nënkupton që nuk do të pengojmë themelimin e institucioneve, në asnjë mënyrë, nëse ka nevojë për kuorum, do ta bëjmë kuorumin, por na duhet zotimi i pastër me shkrim që këto veprime do të ndërmerren, në kundërvlerë nuk kërkojmë asgjë”, tha ai.
Ai shtoi se AAK nuk kërkon pozita politike në këmbim të mbështetjes.
“Edhe një herë, jemi të gatshëm edhe të bëjmë kuorum, por po kërkojmë diçka për qytetarin e Kosovës, jo për vete, nuk kemi kurrfarë kushti vetjak, nuk duam as ministra, as zëvëndësministra, as ambasadorë, as borde, asgjë, por nuk guxojmë ne të jemi indiferentë dhe mos ta përdorim peshën tonë politike për ta rregulluar jetën e qytetarit të Kosovës”, tha kryetari i AAK-së.
Duke folur për çështjen e postit të presidentit, Gjini përmendi edhe mundësinë që Ramush Haradinaj të propozohet në këtë pozitë, duke e cilësuar si një nder për partinë, por pa e vendosur si kusht.
“Nëse Ramush Haradinaj do të propozohet për president, vlen e njëjta formulë, për neve do të ishte nder, por nuk jemi duke e vendosur si kusht. Ne mendojmë që Kosova nuk do të mund të kishte president më të mirë se Ramush Haradinaj tash, mirëpo nuk po duam ta bllokojmë Kosovën për këtë bindje tonën që është e plotë dhe e pandryshueshme”, tha Gjini.
