Zëdhënësi i Qeverisë, Arlind Manxhuka, ka deklaruar se Lëvizja Vetëvendosje mbetet e përkushtuar për dialog dhe bashkëpunim me partitë politike, me synim krijimin e institucioneve të reja pas zgjedhjeve të 7 qershorit.
Manxhuka duke reaguar ndaj raportimeve të djeshme se është arritur në parim një marrëveshje ndërmjet LDK-së dhe LVV-së për bashkëqeverisje, ka thënë se partia e tij po bën përpjekje maksimale për të gjetur zgjidhje, përfshirë edhe çështjen e presidentit, me qëllim që vendi të mos shkojë sërish në zgjedhje.
“Ne përpiqemi maksimalisht. Jemi aktivë e konstruktivë për takime dhe bashkëbisedime, të hapur e të sinqertë për marrëveshje. Po bëjmë përpjekje maksimale që të zgjidhet çështja e presidentit dhe të mos ketë sërish zgjedhje. Shpresojmë që opozita nuk do të barrikadohet kundër dhe të na çojë në zgjedhje përsëri”, deklaroi Manxhuka.
Një ditë më parë, kryetari i Lidhjes Demokratike të Kosovës, Lumir Abdixhiku, bëri të ditur se ka pezulluar negociatat me kryetarin e Lëvizjes Vetëvendosje, Albin Kurti. Sipas tij, vendimi erdhi pas zhvillimeve të fundit brenda LDK-së, ku janë dorëzuar nënshkrimet për thirrjen e Kuvendit të Jashtëzakonshëm të partisë, me kërkesë për shkarkimin e tij nga posti i kryetarit.
Ndërkohë, LVV ka riafirmuar gatishmërinë për vazhdimin e takimeve me partitë politike, me synim arritjen e një marrëveshjeje dhe funksionalizimin e institucioneve të reja.
