Ish-nënkryetari i Lidhjes Demokratike të Kosovës (LDK), Agim Veliu, ka reaguar pas rezultateve të zgjedhjeve të 7 qershorit, duke kritikuar ashpër lidershipin aktual të partisë dhe mënyrën e drejtimit të saj, përcjell KosovaPost.
Në një status në Facebook, Veliu ka thënë se rezultati zgjedhor nuk mund të paraqitet si sukses dhe se LDK-ja ka mbetur në vendin e tretë, larg pritjeve të krijuara gjatë fushatës zgjedhore.
“Rezultati i zgjedhjeve të 7 qershorit, përfundimisht, nuk mund të maskohet me interpretime kreative apo të paraqitet si sukses. Qytetarët folën qartë, ndërsa LDK-ja mbeti e betonuar në vendin e tretë, larg pritjeve që vetë lidershipi krijoi gjatë fushatës zgjedhore dhe para saj,” ka shkruar Veliu.
Ai ka theksuar se përgjegjësia politike për këtë rezultat bie mbi udhëheqjen e partisë, duke përmendur kryetarin Lumir Abdixhiku dhe presidenten Vjosa Osmani si pjesë të projektit politik të LDK-së në këtë periudhë.
Sipas tij, në parti janë injoruar paralajmërimet e aktivistëve dhe figurave të ndryshme për probleme të brendshme, si centralizimi i vendimmarrjes, margjinalizimi i mendimit ndryshe dhe largimi nga baza elektorale.
“U shpërfillën paralajmërimet e veprimtarëve, aktivistëve dhe figurave të shumta të LDK-së për centralizimin e partisë, margjinalizimin e mendimit ndryshe, largimin nga baza elektorale dhe së fundmi përzgjedhjen e kandidatëve sipas shijes dhe interesave personale e grupore. Rezultati zgjedhor dëshmoi se ato shqetësime nuk ishin të pabaza,” ka shkruar ai.
Veliu ka shtuar se lidershipi aktual duhet të pranojë dështimin dhe të marrë përgjegjësi konkrete, duke kërkuar ndryshime të thella në parti.
“LDK-ja ka nevojë për më shumë se reflektim formal. Ka nevojë për përgjegjësi konkrete,” ka theksuar ai.
Ai ka kërkuar nisjen e një procesi zgjedhor të rregullt dhe transparent brenda partisë, duke shtuar se vetëm përmes hapjes së garës dhe rikthimit të demokracisë së brendshme mund të rikthehet besimi i elektoratit.
“Nëse LDK-ja dëshiron të rikthejë besimin e humbur, ndryshimi duhet të fillojë nga maja e saj. Sepse partitë nuk dobësohen nga humbjet zgjedhore, por nga refuzimi për të nxjerrë mësime prej tyre,” ka shkruar Veliu.
Në fund të reagimit të tij, ai ka theksuar se LDK duhet t’i kthehet vetvetes dhe mbështetësve të saj.
