Bashkimi Evropian në Kosovë ka reaguar pas rrënimit të disa shtëpive pranë Liqenit të Ujmanit, duke shprehur keqardhje që objektet u shembën ndërkohë që banorët e prekur kishin nisur procedurat gjyqësore brenda afatit 15-ditor të përcaktuar në njoftimet e ndërmarrjes publike Ibër-Lepenc për lirimin dhe pastrimin e tokës.
Përmes një deklarate, BE-ja ka shprehur shqetësim për, sipas saj, mosrespektimin e procedurës së rregullt ligjore në këtë rast, si dhe në disa raste të ngjashme të evidentuara në veri të Kosovës që nga shkurti i këtij viti.
Në reagim, Bashkimi Evropian u ka bërë thirrje autoriteteve që të ndërpresin menjëherë çdo rrënim, largim të detyruar apo marrje në posedim të pronave, derisa të trajtohen në mënyrë të plotë çështjet që lidhen me procedurën ligjore, të drejtat pronësore, të drejtat e njeriut dhe mjetet juridike efektive.
“Autoritetet duhet të bashkëpunojnë pa vonesë me banorët dhe komunat e prekura dhe të shqyrtojnë zgjidhje të ligjshme. Roli i Policisë së Kosovës në operacione të tilla duhet të mbetet rreptësisht brenda mandatit të saj ligjor, të bazohet në kërkesa ose vendime të qarta të autoriteteve kompetente dhe të dokumentohet në mënyrë të duhur. Masat e pakthyeshme të zbatimit në kontekstin e procedurave në zhvillim dhe pretendimeve të kontestuara pronësore ngrisin shqetësime serioze për sundimin e ligjit”, thuhet në deklaratën e BE-së.
BE-ja thekson se pret nga autoritetet e Kosovës që t’i adresojnë këto shqetësime me urgjencë dhe transparencë, në përputhje me standardet evropiane.
“Në përputhje me rrugën evropiane të Kosovës, BE-ja pret që autoritetet t’i adresojnë këto shqetësime me urgjencë dhe transparencë dhe të sigurojnë që veprime të ngjashme të mos përsëriten”, thuhet në reagim.
