Një përplasje që po trondit peizazhin politik dhe ekonomik të Shteteve të Bashkuara, ku dy nga figurat më të fuqishme të kohës, presidenti Donald Trump dhe miliarderi Elon Musk, janë përfshirë në një luftë të hapur publike, e cila po zgjerohet me ritme të shpejta, shkruan A2 CNN. Nga kërcënime ndaj kontratave shtetërore, deri te sulme personale dhe akuza të ashpra, përplasja mes tyre po kthehet në një betejë që mund të ketë pasoja të mëdha për të ardhmen e politikës dhe teknologjisë amerikane.
Gjithçka filloi si një mosmarrëveshje mbi një projektligj të ri të Trump-it, por shumë shpejt mori përmasa dramatike. Trump akuzoi Musk për “mungesë mirënjohjeje” dhe kërcënoi t’i ndërpresë subvencionet dhe kontratat miliarda dollarëshe që kompanitë e Musk kanë me qeverinë amerikane, veçanërisht SpaceX, e cila është jetike për programin hapësinor amerikan. Ai shkroi në rrjetin e tij Truth Social: “Mënyra më e lehtë për të kursyer miliarda është ndërprerja e kontratave me Elon-in”.
Reagimi i Musk nuk vonoi. Ai iu përgjigj në rrjetin X (ish-Twitter) me një mesazh të shkurtër: “Whatever”. Më pas vijoi me një sërë sulmesh të hapura, ku kërkoi edhe shkarkimin e Trump-it dhe madje aludoi, pa prova, se Trump mund të përmendet në dokumente të papublikuara mbi skandalin e Jeffrey Epstein. Kjo akuzë u pasua me një përgjigje të vakët nga zëdhënësja e Trump-it, Karoline Leavitt, e cila e quajti “një episod të pafat nga ana e Elon-it, pasi projektligji i buxhetit nuk përfshinte ato që ai donte”.
Musk shkoi aq larg sa të kërcënonte se do të nxirrte nga përdorimi kapsulat hapësinore Dragon, të cilat NASA i përdor për të dërguar astronautë në Stacionin Ndërkombëtar Hapësinor. Megjithatë, pas një reagimi nga ndjekësit e tij në X, ai u tërhoq dhe tha: “Këshillë e mirë. Ok, nuk do ta nxjerrim Dragon nga përdorimi”.
Në këtë konflikt të tensionuar, askush nuk del i paprekur. Aksionet e Tesla-s ranë me 14% pas kërcënimeve të Trump-it, duke treguar se tregjet janë tepër të ndjeshme ndaj kësaj lufte të brendshme. Nga ana tjetër, Musk ka në dispozicion burime të pakufizuara dhe ndikim të madh në media dhe politikë, madje ka sinjalizuar se mund të mbështesë financiarisht kandidatët që sfidojnë aleatët e Trump-it në zgjedhjet e ardhshme.
Përplasja e tyre ka ardhur pas një periudhe marrëdhëniesh të ngushta. Musk kishte një rol të veçantë në administratën Trump si drejtues i Departamentit për Efiçiencë Qeveritare (i njohur si “DOGE”), ku kishte fituar duartrokitje dhe kritika për mbylljen e disa agjencive federale. Mirëpo, fundi i mandatit të tij 130-ditor javën e kaluar duket se shënoi edhe fundin e miqësisë së tyre.
Në një takim në Zyrën Ovale me kancelarin e ri gjerman Friedrich Merz, Trump u shpreh i “zhgënjyer” nga qëndrimi i Musk, ndërsa tha se “kishin pasur një marrëdhënie të mirë”, një koment që vërejti përdorimin e kohës së shkuar.
Ndërkohë, demokratët qëndrojnë në heshtje, duke vëzhguar me kujdes. Disa prej tyre janë të tunduar për të shfrytëzuar këtë ndarje për të përçarë republikanët, ndërsa të tjerë janë skeptikë për t’i hapur derën Musk-ut, që dikur ishte mbështetës i tyre. Strategjisti demokrat Liam Kerr tha për Politico: “Çdo veprim që ai bën që e largon nga republikanët, i dëmton ata”.
A do të jetë kjo përplasje një episod i përkohshëm apo fillimi i një beteje shumëvjeçare? Musk paralajmëroi se Trump ka edhe 3,5 vite si president, por ai vetë do të jetë “përreth për 40 vjet të tjera”. Nëse kjo luftë nuk fashitet, ajo mund të përkufizojë jo vetëm katër vitet e ardhshme në Uashington, por edhe të ardhmen e teknologjisë dhe pushtetit në SHBA. (A2 Televizion)
