Arsenal ka shënuar një fitore të thellë 5-1 ndaj Manchester City në “Emirates Stadium”, duke e thelluar krizën e kampionit në fuqi dhe njëkohësisht duke i mbajtur gjallë shpresat për titull në Premier League.
Skuadra e Pep Guardiola, e cila gjatë mesjavës kishte siguruar kualifikimin në rrethin tjetër të Champions League, është rikthyer shpejt në realitet, duke pësuar debakël përballë një Arsenal të pandalshëm.
Vetëm dy minuta pas fillimit të ndeshjes, një gabim i Akanji i ka dhënë mundësinë Kai Havertz të asistonte për Martin Odegaard, i cili ka shënuar lehtësisht në portën e zbrazët.
Vetëm pak çaste më vonë, Gabriel Martinelli e ka dërguar topin në rrjetë për herë të dytë, por goli i tij është anuluar për pozicion jashtë loje.
City ka arritur të kërcënojë për herë të parë në minutën e njëzet e pestë, kur David Raya ka bërë një pritje spektakolare për ta ndalur goditjen nga afër të Josko Gvardioli. Megjithatë, gabimet e mysafirëve kanë vazhduar, me Mateo Kovacic që ka humbur një top në zonën e rrezikshme, por Havertz nuk ka arritur ta shfrytëzonte rastin, duke gabuar përballë portierit Stefan Ortega.
Pavarësisht paraqitjes së dobët në pjesën e parë, City ka barazuar shifrat menjëherë pas pushimit. Erling Haaland, i cili ka qenë thuajse i padukshëm gjatë dyzet e pesë minutave të para, ka treguar klasin e tij duke realizuar me kokë pas një krosimi të Savinho.
Megjithatë, Arsenal ka reaguar menjëherë dhe e ka rikthyer epërsinë pas një gabimi të Phil Foden, që i ka dhuruar topin Thomas Parteyt. Mesfushori nga Gana ka avancuar para dhe gjuajtja e tij, e devijuar nga një mbrojtës i City, ka përfunduar në rrjetë.
“Topçinjtë” nuk janë ndalur me kaq dhe kanë realizuar një tjetër gol me talentin e ri Myles Lewis-Skelly, i cili ka shënuar me një goditje të harkuar dhe më pas ka provokuar kundërshtarët duke imituar festimin e Haaland.
Në minutat në vazhdim, Arsenal ka vazhduar dominimin dhe e ka gjetur golin e katërt me Kai Havertz, i cili e ka korrigjuar gabimin e mëhershëm duke realizuar pas një kundërsulmi të shpejtë.
Pep Guardiola nuk ka mundur ta ndryshonte rrjedhën e ndeshjes.
City, përveç se ka pësuar humbjen e dytë në dyzet e një ndeshjet e fundit të Premier League, tani ndodhet njëmbëdhjetë pikë prapa në garën për titull.
Aktualisht tabela e Premier league kryesohet nga Liverpool, Arsenal në vendin e dytë e City në vendin e katërt./rtk
