Grupi Politik i Demokratëve Evropianë (PDE/EDP) ka kërkuar që Serbia të lejojë një hetim të pavarur ndërkombëtar lidhur me pretendimet për përdorimin e një arme zanore ose pajisjeje të ngjashme akustike gjatë protestës masive të 15 marsit 2025 në Beograd.
Sipas reagimit të tyre, përdorimi i dyshuar i pajisjes shkaktoi tronditje, panik, të përziera dhe simptoma të tjera te protestuesit, ndërsa autorët ende nuk janë identifikuar apo mbajtur përgjegjës.
“Më 15 mars 2025, gjatë një proteste masive në Beograd, pati pretendime të besueshme se kundër protestuesve u përdor një armë zanore ose një pajisje e ngjashme akustike, e cila shkaktoi tronditje, panik, të përziera dhe simptoma të tjera. Ishte një incident tronditës, megjithatë personat përgjegjës ende nuk janë identifikuar dhe nuk janë mbajtur përgjegjës. Analisti ushtarak Aleksandar Radić tani është ndjekur penalisht, me pretekstin se po përgatiste veprime kundër rendit kushtetues të Serbisë, për shkak të hetimit të tij mbi përdorimin e dyshuar të kësaj arme. Prokuroria publikoi gjithashtu bisedat e tij private me gazetarë dhe zbuloi identitetin e tyre, duke minuar rëndë lirinë e medias dhe mbrojtjen e burimeve gazetareske”, thuhet në postimin e Grupi Politik të Demokratëve Evropianë.
Sipas tyre, Serbia duhet të lejojë një hetim të pavarur ndërkombëtar për atë që ndodhi më 15 mars.
“Hetimi i ligjshëm dhe kërkimi i së vërtetës nuk janë krim. Skandali i vërtetë është dështimi për të zbuluar se kush e autorizoi dhe e përdori këtë pajisje kundër qytetarëve paqësorë. Në vend që të sigurojë përgjegjësi, qeveria e Aleksandar Vuçiqit po i shndërron institucionet e Serbisë në mjete frikësimi, duke vënë në shënjestër ata që kërkojnë të vërtetën, ndërsa mbron ata që mbajnë përgjegjësi për këtë ngjarje”, shkruan Grupi Politik i Demokratëve Evropianë.
