Deputeti ukrainas, Oleksiy Goncharenko ka komentuar takimin e presidentit të Ukrainës, Volodymyr Zelensky me presidentin serb Aleksandar Vuçiq në Athinë.
Goncharenko, deklaroi sot se Ukraina duhet ta njohë pavarësinë e Kosovës.
Këto komente ai i bëri përmes një postimi në platformën “X”, derisa tha se Serbia është aleate e Rusisë dhe se Ukraina nuk mund ta tërheq në anën e saj.
“Zelensky u takua me Presidentin e Serbisë. Serbia është aleate e Rusisë. Ne nuk do të mund ta tërheqim Serbinë në anën tonë. Dhe kjo nuk është për shkak se ne jemi shumë të këqij, por sepse popullsia e Serbisë mbështet Rusinë në një shumicë të pabesueshme. A duhet të takohemi atëherë? Po sigurisht. A duhet të kompromentojmë parimet tona? Jo. Ukraina duhet ta njohë pavarësinë e Kosovës”, ka shkruar ai.
Ndryshe Vuçiq pas takimit me Zelenskyn ka thënë se kanë folur edhe për situatën në Kosovë.
“Ia shpjegova situatën rreth Kosovës. Nuk mendoj se do të ketë ndonjë ndryshim në pozicionin e Ukrainës në lidhje me integritetin tonë territorial. Ne e mbështetëm Ukrainën në rrugën e saj evropiane”, ka thënë Vuçiq.
