Në një fjalim të gjatë nga sheshi “Skënderbej”, kryeministri Edi Rama shpalli fitoren e Partisë Socialiste në zgjedhjet e 11 majit në Shqipëri, duke e cilësuar rezultatin si “fitore me notën 10” dhe si “një referendum për rrugën europiane të Shqipërisë”.
I shoqëruar nga familja, Rama u ngjit në simbolin e BE-së për të adresuar qytetarët, duke shprehur falënderime për mbështetjen dhe duke u zotuar se mandati i katërt siç tha ai do të jetë mandati i vendosjes së Shqipërisë përfundimisht në tryezën e Bashkimit Europian.
“Ky popull nuk ka për të ndryshuar qeverinë që ka, pa ndryshuar më parë opozitën që nuk do”, tha ai.
Rama u shpreh se rezultati i këtyre zgjedhjeve është politikisht i barasvlershëm me kthesën e vitit 1992.
Ai shtoi se gjatë tre ditëve të ardhshme Shqipëria do të jetë “në kuptimin e plotë të fjalës, qendra e Evropës”, për shkak të samitit të Komunitetit Politik Evropian që do të mbahet në Tiranë. Rama përmendi vizitën historike të kryeministrit britanik Keir Starmer dhe atë të presidentit francez Emmanuel Macron, i cili do të qëndrojë në Tiranë për një vizitë të dytë bilaterale pas samitit.
Në mesazhin e tij për partitë e reja opozitare që arritën të futen në Parlament, Rama theksoi se ato duhet të jenë “alternativa, jo volume zanore në mexhelisin politik”. “Uroj që të gjejnë mënyra për t’u rritur si alternativa dhe jo si zëra të zhurmshëm pa përmbajtje”, shtoi ai.
Një pjesë e veçantë e fjalimit iu kushtua falënderimeve personale. Kryeministri kërkoi ndjesë për përmendjen e prindërve të tij në debatin politik dhe falënderoi publikisht fëmijët e tij për qëndrimin larg çdo konflikti interesi. Ai shprehu mirënjohje të veçantë për bashkëshorten Linda Rama, të cilën e quajti “opozita që nuk e mund dot, por që më pranon në qeverinë e unitetit”.
Ndër momentet më simbolike të fjalimit ishin përshkrimet krahasuese që Rama bëri mes të ardhmes dhe të shkuarës politike: “Mes dritës së Europës dhe errësirës së gropës së një kapeleje fake, Shqipëria zgjodhi yjet. Mes ngjitjes në majë dhe rënies në humnerë, Shqipëria zgjodhi ngjitjen”.
Rama u ndal edhe te vota e emigrantëve, duke e quajtur një arritje historike për demokracinë shqiptare.
“S’ka fjalë të mjaftueshme për të falenderuar dhjetëra e mijëra gra e burrat, vajzat e djemtë të familjes tonë politike që 4 vjet me radhë shtruan me përpjekje durim e displinë dhe së fundmi për 9 muaj pa pushim edhe në çdo drejtim jashtë kufijve ku jetojnë shqiptarët rrugën e kësaj fitoreje të paharrueshme.Një falenderim krejt të veçantë dua ta bëj për shqiptarët e Greqisë, Italisë, SHBA e kudo tjetër, ku qoftë edhe një shqiptar i vetëm u regjistrua si zgjedhës. Ka qenë ushtrim i parë historik për nga fakti i herës së parë dhe fantastik për nga numri i pjesëmarrësve në raport me atë të regjistruarve një nga më të lartët nga votimet e diasporës në Evropë“, tha më tej Rama.
Kryeministri premtoi një mandat me reforma të thella ekonomike dhe investime strategjike, nga infrastruktura dhe turizmi deri te arsimi dhe siguria. “Ky është një mandat që duhet të na çojë drejt fundit të historisë së një kombi të dorës së dytë dhe drejt një Shqipërie ku qytetarët tanë të ndihen të barabartë në Europë”, deklaroi Rama, ndërsa mbylli fjalimin duke iu drejtuar qytetarëve: “Kini besim te Shqipëria sepse Shqipëria ka besim te ne”.
