Kryetari i Organizatës së Veteranëve të Luftës së UÇK-së, Hysni Gucati, u ka bërë thirrje Bashkimit Evropian dhe ambasadorëve të huaj që të mos ndërhyjnë politikisht në mënyrën se si perceptohet vendimi i pritshëm i Gjykatës Speciale më 16 shtator.
Gucati ka kritikuar deklaratat e diplomatëve të huaj dhe të BE-së, të cilët kanë theksuar se procesi gjyqësor nuk përfundon me vendimin e shkallës së parë, pasi palët kanë të drejtë ankese.
Sipas tij, një qasje e tillë krijon përshtypjen se një vendim i pafavorshëm në shkallën e parë mund të korrigjohet më vonë në Apel.
“Veç çka nuk po thonë direkt: ‘Mos na pengoni t’i dënojmë një herë, sepse në Apel i shpallim të pafajshëm’”, ka deklaruar Gucati.
Ai e ka cilësuar këtë si “lojë të pistë politike me shkallët e drejtësisë”, duke argumentuar se pasojat e një vendimi të shkallës së parë, sipas tij, do të ishin të menjëhershme dhe nuk do të prisnin përfundimin e procedurave të apelit.
“Një vendim i padrejtë në shkallën e parë nuk zhbëhet me një pafajësi në shkallën e dytë”, ka thënë ai.
Gucati ka pretenduar gjithashtu se Gjykata Speciale, që nga krijimi i saj, ka qenë e ndikuar nga faktorët diplomatikë ndërkombëtarë dhe se vendimet e saj mund të kenë pasoja për mënyrën se si perceptohet lufta e UÇK-së dhe shtetësia e Kosovës.
“Dëmi për Kosovën bëhet atë ditë. Historia rishkruhet atë ditë. Serbia e shfrytëzon atë ditë. Dhe Serbia nuk e pret Apelin”, është shprehur Gucati.
Sipas tij, një vendim që do ta lidhte luftën e UÇK-së me kriminalitet të organizuar do të mund të përdorej nga Serbia në arenën ndërkombëtare, përfshirë OKB-në dhe diplomacinë, si dhe në përpjekjet për delegjitimimin e Kosovës.
Gucati ka paralajmëruar edhe pasoja të mundshme brenda Kosovës, duke thënë se një narrativë e tillë do të mund të ndikonte në perceptimin e luftës çlirimtare, ndërhyrjes së NATO-s dhe bazës politike e morale mbi të cilën është ndërtuar shteti i Kosovës.
“Nëse një gjykatë e lidh luftën çlirimtare të Kosovës me kriminalitet të organizuar, dëmi nuk mbetet vetëm në sallën e gjyqit në Hagë. Nga ajo sallë do të kriminalizohej botërisht lufta e UÇK-së”, ka deklaruar ai.
Kreu i OVL-UÇK-së ka kritikuar edhe qasjen e bashkësisë ndërkombëtare ndaj Kosovës, duke thënë se një vendim i padrejtë do të mund të krijonte pasoja të reja në raportet ndërmjet komuniteteve dhe në procesin e pajtimit.
“Paqja nuk ndërtohet duke e poshtëruar drejtësinë. Pajtimi nuk ndërtohet duke kriminalizuar viktimën si palë. Dhe stabiliteti nuk ruhet duke luajtur me plagët e popullit tonë”, ka thënë Gucati.
Ai ka argumentuar se drejtësia nuk duhet të shihet vetëm si një proces që përfundon me vendimin e Apelit, pasi edhe vendimi i shkallës së parë mund të ketë ndikim të madh politik dhe shoqëror.
“Drejtësia nuk është lojë me shkallë, ku dëmi i shkaktuar në të parën harrohet pas vendimit të dytë”, ka theksuar ai.
Në fund, Gucati u ka drejtuar një apel të drejtpërdrejtë BE-së dhe ambasadorëve të huaj që të mos ndikojnë në perceptimin publik dhe politik të vendimit të 16 shtatorit.
“Prandaj, APELI që veteranët e UÇK-së ia drejtojnë BE-së dhe ambasadorëve të huaj është që të mos bëjnë politikë me vendimin e 16 shtatorit në Gjykatën Speciale”, ka deklaruar Gucati.
Ai e ka përmbyllur thirrjen me një mesazh të drejtpërdrejtë ndaj përfaqësuesve ndërkombëtarë:
“Mos luani më shumë me plagët tona! Mos e bëni këtë gabim!”
