Kandidati për kryeministër nga Koalicioni AAK, Nisma, Konservatorët E-30 dhe Partia Ideal, Ramush Haradinaj, ka premtuar ndërtimin e tetë liqeneve akumulues për të siguruar furnizim të qëndrueshëm me ujë të pijshëm në Kosovë.
“Kosova Fituese” me ndërtimin e digave do të zgjidhë problemin e furnizimit me ujë për njëqind vitet e ardhshme. Jemi të vendosur ta bëjmë këtë zotim realitet, sepse është një detyrim ndaj Kosovës,” ka deklaruar Haradinaj.
Ai ka theksuar se ky plan është pjesë e Strategjisë shtetërore për Ujërat, e hartuar gjatë qeverisjes së tij.
Haradinaj thotë se projekti parasheh ndërtimin e digave në disa lokacione:
Diga në lumin Lepenc, në fshatin Firajë – furnizim me ujë për Ferizaj, Kaçanik, Shtërpcë, Shtime dhe Lipjan.
Diga në lumin Manastircë, afër fshatit Reçan – furnizim për Prizrenin.
Diga në Dragaçinë – furnizim për Suharekën.
Diga në Lloqan – furnizim për Deçanin.
Diga e Pollatës – furnizim për Prishtinën dhe Podujevën.
Diga e Kuqicës – furnizim për Drenasin dhe Skenderajn.
Digat e Kremenadës ose Desivojcës – furnizim për Kamenicën.
Diga në Shushë të Vitisë ose në Pogragjë të Gjilanit – për furnizimin me ujë të Gjilanit dhe Vitisë, varësisht nga studimi i fizibilitetit.
Haradinaj ka theksuar se përveç furnizimit me ujë të pijshëm, këto diga do të përdoren edhe për ujitjen e tokave bujqësore, prodhimin e energjisë përmes hidrocentraleve dhe zhvillimin e zonave rekreative.
“Programi i koalicionit për Kosovën Fituese përmban konceptet inxhinierike të gatshme për zbatimin e këtyre projekteve,” ka shtuar ai.
