Ministri i Financave, Hekuran Murati, ka reaguar lidhur me zhvillimet politike rreth zgjedhjes së presidentit të Kosovës dhe ofertës së re të kryeministrit Albin Kurti drejtuar PDK-së, përcjell KosovaPost.
Murati ka thënë se disa media janë nxituar ta konfirmojnë tërheqjen e profesorit Bekim Sejdiu nga kandidatura për president, në vend që, sipas tij, ta marrin fillimisht përgjigjen e kryetarit të PDK-së, Bedri Hamza, për ofertën e re të Kurtit.
Në postimin e tij, Murati ka paraqitur ofertën që, sipas tij, i është bërë PDK-së: edhe nëse vetëm gjysma e grupit parlamentar të PDK-së e votojnë kundër Bekim Sejdiut për president, Vetëvendosje do t’i japë votat e saj për Projektligjin për ndryshimin dhe plotësimin e Ligjit për Dhomat e Specializuara, në lexim të dytë.
“Disa medie u nxituan që ta rikonfirmojnë tërheqjen e Prof. Bekim Sejdiut për President të Republikës në vend se ta marrin përgjigjen nga kryetari i PDK-së, Bedri Hamza, për ofertën e re të Kryeministrit Kurti”, ka shkruar Murati.
Më tej, ministri u është drejtuar gazetarëve duke u kërkuar që përgjigjen ta kërkojnë nga lideri i PDK-së.
“Të dashur gazetarë, pyeteni së pari Hamzën. Le të thotë Bedri Hamza PO”, shkroi Murati.
Sipas tij, në një skenar të tillë, Kurti dhe kryetari i LDK-së, Lumir Abdixhiku, do të mund të takoheshin me Bekim Sejdiun për ta bindur atë që të mos shkojë vendi në zgjedhje të reja.
