Filiz Mustafa, ish-kandidat i Lëvizjes Vetëvendosje për kryetar të Komunës së Dragashit, ka publikuar një fotografi të Fehim Salit, i cili është arrestuar sot, së bashku me ministrin e Brendshëm të Serbisë, Ivica Daçiq.
“Ky fotografim i bërë para disa vitesh ku janë bashkë Ivica Daçiq dhe i arrestuari i sotëm Fehim Sali”, ka shkruar Mustafa.
Ai ka vlerësuar veprimin e institucioneve të Kosovës lidhur me arrestimin e Salit, i dyshuar për spiunazh, duke thënë se sot “shteti dhe institucionet përkatëse vepruan”.
Në të njëjtën kohë, Mustafa ka kërkuar më shumë përgjegjësi nga politikanët lokal, që të mos bashkëpunojnë me persona që, sipas tij, dyshohet se i shërbejnë institucioneve të Serbisë.
Postimi i tij vjen në ditën kur Fehim Sali është arrestuar nga Policia e Kosovës nën dyshimin për spiunazh, ndërsa rrethanat dhe dyshimet që lidhen me rastin pritet të sqarohen nga institucionet e drejtësisë.
Ivica Daçiq aktualisht është ministër i Brendshëm i Serbisë dhe zëvendëskryeministër i këtij vendi.
RTK do të raportojë për zhvillimet e mëtejshme lidhur me rastin, bazuar në informacionet zyrtare të institucioneve kompetente.
