Derbi i 182-të i Serie A ndërmjet Milan dhe Inter ka dhuruar dramë deri në minutat e fundit, me Stefan de Vrij që ka barazuar në minutën e tretë të kohës shtesë, duke u siguruar “zikaltërve” një pikë të rëndësishme dhe për të shmangur një humbje të dytë radhazi ndaj rivalëve lokalë.
Takimi ka nisur me një ritëm të lartë, teksa të dyja skuadrat kanë sulmuar për ta marrë kontrollin e ndeshjes.
Inter ka menduar se ka kaluar në avantazh brenda shtatë minutash, kur Federico Dimarco e ka dërguar topin në rrjetë, por goli është anuluar për shkak të një pozicioni jashtë loje të Lautaro Martínez.
Nga ana tjetër, Milan është treguar i rrezikshëm me një goditje të Christian Pulisic, e cila është devijuar jashtë, dhe një tentativë të Nicolo Barella që është ndalur nga Mike Maignan.
Me kalimin e minutave, Inter ka marrë më shumë iniciativë dhe në afër gjysmë ore lojë Lautaro Martinez ka pasur disa mundësi të mira, por pa arritur të shënojë. Fillimisht, ai ka devijuar jashtë një harkim të Hakan Calhanoglu, më pas e ka dërguar topin në rrjetë, por goli është anuluar për një pozicion jashtë loje të Barella. Edhe një tjetër goditje e tij është bllokuar nga Strahinja Pavlovic. Milan ka reaguar në fund të pjesës së parë, me një goditje të fortë të Tijjani Reijnders që është ndalur nga Yann Sommer, ndërsa një ndërhyrje e Benjamin Pavard ka penguar Rafael Leaon të rrezikojë. Por në minutën e fundit të pjesës së parë, një top i ulët nga Leao është devijuar nga Sommer drejt Reijnders, i cili nuk ka gabuar dhe e ka kaluar Milan në epërsi.
Inter ka reaguar shpejt në pjesën e dytë dhe ka pasur një mundësi të artë menjëherë pas rifillimit, por Martínez ka gjuajtur drejt Maignan. Nga ana tjetër, një kundërsulm i shpejtë i Milan ka përfunduar me një goditje të Leao, të cilën e ka bllokuar Denzel Dumfries. Inter ka vazhduar ta kërkojë golin e barazimit, por është përballur me një mbrojtje të ngjeshur të Milan. Fikayo Tomori e ka ndalur një goditje me kokë të De Vrij, ndërsa Dimarco është ndalur sërish nga Maignan. Në minutën e gjashtëdhjetë e tretë, Simone Inzaghi ka provuar ta ndryshojë fatin e ndeshjes me tre zëvendësime, por Inter ka vazhduar të ishte i pafat, me një tjetër gol të anuluar të Martinez, një goditje me kokë të Yann Bisseck që ka përfunduar në shtyllë dhe dy tentativa të dështuara të Henrikh Mkhitaryan.
Shtylla e ka shpëtuar Milan edhe dy herë të tjera, duke ndalur goditjet e Marcus Thuram dhe Dumfries, ndërsa Maignan ka bërë një ndërhyrje vendimtare për ta ndaluar këtë të fundit. Megjithatë, Inter nuk është dorëzuar dhe në sekondat e fundit të ndeshjes, debutuesi Nicola Zalewski ka asistuar për De Vrij, i cili ka shënuar për të shpëtuar një pikë të rëndësishme për skuadrën e tij.
Në tabelën e Serie A, Inter gjendet në vendin e dytë, ndërsa Milani renditet në vendin e tetë, me Napoli që vazhdon ta kryesojë kampionatin./rtk
