Prishtinë – Ish-komandanti i Policisë Ushtarake të Ushtrisë Çlirimtare të Kosovës (UÇK), Faton Gashi, ka reaguar ashpër ndaj figurës publike dhe analistit Baton Haxhiu, duke e kritikuar për paraqitjet e tij të vazhdueshme në mediat shqiptare, përcjell Kosova Post.
Në reagimin e tij, Gashi e përshkruan Haxhiun me tone të ashpra, duke ngritur pyetje mbi mënyrën se si ai përballet me kritikat dhe reagimet negative që, sipas tij, i adresohen sa herë që shfaqet në studiot televizive.
“Do të ishte me interes për publikun të mësonim nga psikologët, sociologët e fenomenologët se si ndihet një njeri – përkufizimin ‘njeri’ merreni me rezervë – të cilin, sa herë që paraqitet në ndonjë studio televizive, kudo në trojet shqiptare, edhe në ato raste të rralla kur nuk flet fare, të gjithë, pavarësisht dallimeve politike, në mënyrë të hapur e pështyjnë dhe e shajnë”, ka shkruar Gashi.
Ai shton se, pavarësisht këtyre reagimeve, Haxhiu vazhdon, sipas tij, me të njëjtën qasje dhe arrogancë.
“A mund të qëndrojë dikush vërtet indiferent ndaj kësaj? Dhe, nëse po, çfarë lloj personi duhet të jetë ky m*t?”, vijon reagimi i tij.
Gashi ka bërë të ditur gjithashtu se së fundmi ka pranuar një mesazh nga miku i tij, prof. Ali Dulla, të cilin e ka cituar në reagimin e publikuar.
“Psikiatria ende nuk ka një emër për këtë lloj…”, ka qenë mesazhi që, sipas Gashit, i ka dërguar prof. Dulla.
Reagimi i ish-komandantit të Policisë Ushtarake të UÇK-së vjen në një kohë kur debatet publike dhe përplasjet e figurave politike e mediatike në hapësirën shqiptare janë intensifikuar.
