“Kush janë spiunët e BIA-s në Kosovë?” dhe aktakuza voluminoze për veprën penale “Spiunazh” ndaj Bedri Shabanit e Muharrem Qerimit, është tema e sotme që po diskutohet në emisionin Rubikon.
Prokuroria Speciale e Kosovës i ngarkon Shababin e Qerimin me akuzën se i përcollën informata të ndjeshme Agjencisë së Inteligjencës së Sigurisë së Serbisë (BIA) për shtetin e Kosovës, mblodhën informacione për ish-pjesëtarët e krerët e UÇK-së dhe tentuan ta krijonin një narrativë për një “Shtëpi të Verdhë” në Spitalin Ushtarak të UÇK-së në Mollopolc të Shtimes.
Të dy këta sipas aktakuzës, informacionet e grumbulluara ia dërgonin Sërgjan Rosiqit, zyrtarit të BIA-s, i cili u delegonte po ashtu detyrat specifike për informacionet që i duheshin nga Kosova.
Detaje nga kjo aktakuzë, që është ngritur me 19 shkurt, gati tetë muaj pas arrestimit të Shabanit e Qerimit, në Rubikon i zbulon gazetarja Ardiana Thaçi-Mehmeti.
Ajo ka thënë se në një rast i akuzuari Bedri Shabani e njoftonte “shefin” e tij të BIA-së, se bazuar në një fotografi që kishte parë, jeta e presidentit rus Vladimir Putin ishte në rrezik.
Madje ai Putinit i referohej si “miku ynë Putin”.
“Dua t`i përmend dy sekuenca të rëndësishme nga aktakuza ndaj Bedri Shabanit, rasti se si ai e ka pa një fotografi në aeroportin e Prishtinës, nga e cila ai e cilëson se jeta e Vladimir Putinit është në rrezik, për këtë e njofton Sërgjan Rosiq. Bedri Shabani e konstaton se jeta e ‘mikut tonë Putin’ është në rrezik. Dhe një fakt tjetër është se si zotëri Shabani ka hyrë në internet dhe ka kërkuar se si vishen agjentët sekret. Ka qenë i interesuar që të jetë taman një agjent sekret, me veshje, me pseudonim dhe gjithçka tjetër. Është gjetur dëshmi nga policia se ka bërë këto kërkime. Madje edhe numrin e tij të telefonit e ka blerë në Graçanicë, sepse komunikimin e kanë pasur me numra të Serbisë. Me numrin e Kosovës i ka njoftuar se mund të hapin numrin e Serbisë, dhe numrin e Kosovës e ka ruajtur me ‘James Bond’”, tha gazetarja Thaçi-Mehmeti.
