Kryeministri i vendit, Albin Kurti ka pranuar letër urimi nga Kryetari i Forcës së Re Demokratike, njëherësh Kryetari i Komunës së Ulqinit, Genci Nimanbegu, me rastin e 17 Shkurtit, Ditës së Pavarësisë së Republikës së Kosovës.
“Kosova është në dekadën e saj të dytë si shtet i pavarur dhe demokratik, dhe kemi privilegjin të ndajmë me ju krenarinë për arritjet e saj në ndërtimin e shtetit të së drejtës dhe përfaqësimin dinjitoz në arenën ndërkombëtare. Etapa e re e konsolidimit të shtetit, përparimi ekonomik dhe sfidat aspak të lehta që e presin Kosovën kërkojnë maturi dhe vizion për t’i tejkaluar me sukses, ndërsa ne mbetemi besimplotë që Kosova do ťi kapërcejë me vendosmëri”, thuhet në urim.
Më tej, ai ka shprehur urimin që Republika e Kosovës të përmbyll me sukses rrugëtimin e saj integrues drejt Bashkimit Evropian dhe në të ardhmen e afërt të përmbushë kriteret për anëtarësim në NATO.
