Kryeministri në detyrë i Kosovës, Albin Kurti, ka publikuar një mesazh në rrjete sociale me rastin e 250-vjetorit të Deklaratës së Pavarësisë së Shteteve të Bashkuara të Amerikës.
Kurti theksoi se “Jeta, Liria dhe Kërkimi i Lumturisë” janë të drejta të patjetërsueshme të përcaktuara në preambulën e Deklaratës së Pavarësisë së SHBA-së dhe si të tilla kanë shërbyer si frymëzim për botën e civilizuar.
Ai u shpreh se populli i Kosovës për një kohë të gjatë ka qenë i privuar nga këto të drejta, duke shtuar se përvoja e Kosovës është unike, pasi realizimi i tyre është i lidhur ngushtë me Shtetet e Bashkuara të Amerikës.
“Prandaj, këmbënguljes dhe sakrificës së popullit tonë për liri e pavarësi, natyrshëm i erdhi ndihma amerikane,” ka shkruar Kurti.
Ai po ashtu bëri të ditur se ka marrë pjesë në shënimin e Ditës së Pavarësisë së SHBA-së në ambasadën amerikane në Prishtinë, duke theksuar mirënjohjen e Kosovës për ndihmën, partneritetin dhe aleancën e SHBA-ve.
