Kryeministri në detyrë i Kosovës, Albin Kurti, ka pritur sot pasdite delegacionin e “Young Global Leaders” të Forumit Ekonomik Botëror.
Delegacioni përbëhet nga përfaqësues nga 16 shtete të ndryshme, me përvojë në fusha si të drejtat e njeriut, teknologjia dhe sektorë të tjerë.
Gjatë takimit, Kurti ka prezantuar zhvillimet ekonomike të Kosovës, duke përmendur rritjen ekonomike, uljen e papunësisë dhe orientimin e vendit drejt Bashkimit Evropian. Ai ka theksuar se procesi i integrimit në BE është po aq i rëndësishëm sa edhe vetë anëtarësimi.
Kurti ka folur edhe për sektorët me potencial për zhvillim, përfshirë Teknologjinë e Informacionit dhe Komunikimit, përpunimin e drurit dhe metaleve.
Në takim është diskutuar edhe për projektet e planifikuara për katër vitet e ardhshme, ndër to zhvillimi i hekurudhave, Lojërat Mesdhetare, investimet në qendrën e skijimit në Brezovicë, tranzicioni i gjelbër, si dhe sektori i minierave dhe mineraleve.
Po ashtu, gjatë diskutimit të hapur është folur për forcimin e sundimit të ligjit dhe sigurisë, anëtarësimin e Kosovës në NATO dhe përafrimin e politikës së jashtme të Kosovës me atë të Bashkimit Evropian.
