Deputetja e Lëvizjes Vetëvendosje, Shqipe Mehmeti-Selimi, njëherësh bashkëshortja e ish-pjesëtarit të UÇK-së dhe të akuzuarit në Hagë, Rexhep Selimi, ka reaguar pas “Marshit për Liri” të mbajtur në Prishtinë, përcjell KosovaPost.
Ajo ka falënderuar qytetarët që iu bashkuan marshit në mbështetje të ish-drejtuesve të UÇK-së që po gjykohen në Hagë.
“Faleminderit secilit prej jush që u bashkuat në Marshin e Lirisë, në mbrojtje të çlirimtarëve tanë. Faleminderit për praninë dhe mbështetjen tuaj”, ka shkruar Mehmeti-Selimi.
Ajo ka theksuar se, sipas saj, UÇK-ja “ishte, është dhe do të mbetet e pastër”, duke e cilësuar atë si krenari të kombit shqiptar.
Mehmeti-Selimi ka përmendur edhe 16 shtatorin, kur pritet vendimi në çështjen ndaj katër ish-drejtuesve të UÇK-së në Dhomat e Specializuara në Hagë.
“Presim 16 shtatorin dhe vendimin në Dhomat e Specializuara në Hagë, me shpresën dhe besimin se do të jetë vendim lirues, ashtu siç e meritojnë çlirimtarët tanë”, ka shkruar ajo.
Në fund, deputetja e LVV-së e ka mbyllur mesazhin me thirrjet: “Liri për çlirimtarët! Rroftë UÇK-ja!”
