Kryeministri Albin Kurti, ka mirëpritur sot ministrin e Haxhit dhe Umres së Arabisë Saudite, Tawfig Al-Rabiah, përcjell KosovaPost.
Shefi i qeverisë teksa mysafirit i uroi mirëseardhje theksoi rëndësinë e bashkëpunimit dypalësh si dhe shprehu mirënjohje për marrëdhëniet e mira dhe në rritje ndërmjet Kosovës dhe Arabisë Saudite.
“Gjatë takimit kryeministri theksoi rritjen dhe zhvillimin ekonomik që Kosova ka arritur gjatë viteve të fundit. Së bashku diskutuan për mundësinë e investime të reja që do të forconin këtë trend pozitiv, dhe në të njëjtën kohë do të kontribuonin në forcimin e mëtejshëm të lidhjeve miqësore mes dy vendeve”, shkruan në kumtesë.
Kurti gjithashtu falënderoi ministrin Al-Rabiah për mbështetjen e vazhdueshme të Arabisë Saudite ndaj pavarësisë dhe sovranitetit të Kosovës.
Kreu i qeverisë veçoi përkrahjën e rezolutave të miratuara nga Organizata për Bashkëpunim Islamik (OIC) që u bëjnë thirrje shteteve anëtare që nuk e kanë njohur ende Kosovën ta njohin atë.
Në këtë takim, krahas zëvendësministrit të Punëve të Jashtme dhe Diasporës, Kreshnik Ahmeti, i pranishëm ishte edhe Myftiu i Kosovës, Naim Tërrnava dhe përfaqësues të Bashkësisë Islame në Kosovës.
Këtë vit shënohet 15-vjetori i vendosjes së marrëdhënieve diplomatike mes Kosovës dhe Arabisë Saudite.
