Kryeministri në detyrë i Kosovës, Albin Kurti, ka shënuar përvjetorin e opinionit këshillues të Gjykatës Ndërkombëtare të Drejtësisë (GJND) për pavarësinë e Kosovës, duke e cilësuar atë si një prej ngjarjeve më të rëndësishme në konsolidimin e shtetit dhe pozitës së tij në arenën ndërkombëtare.
Përmes një postimi në Facebook, Kurti rikujtoi se opinioni i GJND-së konfirmoi se shpallja e pavarësisë së Kosovës nuk ishte në kundërshtim me të drejtën ndërkombëtare, duke hedhur poshtë një nga argumentet kryesore juridike të përdorura kundër shtetësisë së vendit.
Ai theksoi se ky vendim përfaqëson jo vetëm një fitore për Kosovën, por edhe një mesazh të rëndësishëm për rendin ndërkombëtar, pasi sipas tij dëshmoi se e drejta ndërkombëtare nuk pengon deklaratat e pavarësisë dhe se secili rast duhet të trajtohet në bazë të rrethanave dhe normave përkatëse.
Kurti vlerësoi se opinioni i GJND-së forcoi subjektivitetin ndërkombëtar të Kosovës dhe krijoi një bazë më të fuqishme për afirmimin e shtetësisë së saj në marrëdhëniet ndërkombëtare.
Në të njëjtën kohë, ai theksoi se ruajtja e kësaj arritjeje kërkon angazhim të vazhdueshëm për ndërtimin e institucioneve demokratike, respektimin e sundimit të ligjit dhe forcimin e legjitimitetit të Republikës së Kosovës përmes zhvillimit dhe përgjegjësisë institucionale.
Në fund të mesazhit, Kurti përkujtoi se opinioni këshillues u shpall nga ish-kryetari i GJND-së, profesori Hisashi Owada, i cili vitin e kaluar u nderua nga Universiteti i Prishtinës me titullin “Doctor Honoris Causa” për kontributin e tij në të drejtën ndërkombëtare, drejtësi dhe promovimin e paqes.
