Kryeministri në detyrë i Kosovës, Albin Kurti, ka pritur në takim lamtumirës ambasadorin e Zvicrës në Kosovë, Jürg Sprecher, me rastin e përfundimit të mandatit të tij diplomatik në vend.
Përmes një postimi, Kurti e falënderoi ambasadorin zviceran për bashkëpunimin dhe angazhimin e tij në thellimin e marrëdhënieve ndërmjet Kosovës dhe Zvicrës.
“E falënderova për bashkëpunimin e afërt dhe kontributin e çmuar në kultivimin e marrëdhënieve të shkëlqyeshme dhe forcimin e partneritetit ndërmjet dy shteteve”, ka shkruar Kurti.
Ai theksoi se Zvicra ka qenë ndër mbështetëset më të rëndësishme të Kosovës që nga periudha e çlirimit, shpallja e pavarësisë dhe procesi i ndërtimit të institucioneve.
“Zvicra mbetet një nga mbështetëset më të mëdha të Kosovës nga çlirimi, pavarësia e deri te zhvillimi dhe forcimi i institucioneve të Republikës sonë”, u shpreh Kurti.
Kryeministri në detyrë vlerësoi edhe rolin e diasporës kosovare në Zvicër, duke e cilësuar atë si një urë të fuqishme lidhëse ndërmjet dy shteteve dhe një faktor të rëndësishëm në zgjerimin e bashkëpunimit ekonomik.
“Mërgata jonë e dashur është themel i lidhjes së fortë mes dy shteteve tona, që gradualisht dhe vazhdimisht po rrisin bashkëpunimin ekonomik dhe shkëmbimet tregtare”, deklaroi ai.
Kurti bëri të ditur se marrëdhëniet ekonomike mes Kosovës dhe Zvicrës pritet të forcohen edhe më tej pas ratifikimit të marrëveshjes për tregti të lirë në kuadër të EFTA-s.
Ai përmendi gjithashtu mbështetjen e vazhdueshme të Zvicrës për Kosovën përmes pjesëmarrjes në misionin e KFOR-it dhe programeve të Agjencisë Zvicerane për Zhvillim dhe Bashkëpunim (SDC).
Sipas Kurtit, për periudhën 2026–2029, Zvicra ka zotuar më shumë se 64 milionë franga zvicerane (CHF), përkatësisht rreth 68 milionë euro, për projekte në Kosovë, pas 88 milionë CHF të ndara për periudhën 2022–2025.
