Kryeministri i Kosovës, Albin Kurti ka thënë se krahasuar me tre vjet më parë në vendin tonë është rritur punësimi për 20 përqind. Ai një deklaratë të tillë e bëri në ceremoninë e nënshkrimit të kontratave me përfituesit nga Programi për Zhvillim Rajonal të Balancuar.
Kurti ka thënë se qeveria e tij ka mbështetur në vazhdimësi bizneset.
“Kjo iniciativë i përkrah bizneset vendore, sipërmarrësit e rinj, të rejat e të rinjtë tanë për të ngritur e zhvilluar aktivitetet e tyre. Qeveria e Republikës së Kosovës është e përkushtuar që të mbështes sektorin privat i cili është një faktor i rëndësishëm i punësimit dhe rritjes ekonomike në vendin tonë. Krahasuar me vitin 2021, tash që po flasim në vitin 2024, Bruto Produkti Vendor është për 1/3 më i lartë, derisa buxheti shtetëror vjetor është për 35 përqind”, ka theksuar Kurti.
Sipas tij kjo rritje është përkthyer edhe në punësim të shtuar.
“Krahasuar para tre vjetëve në Kosovë është rritur punësimi për 20 përqind, përfshirë këtu dyfishimin e të rinjve të punësuar. E pa dyshim që kjo ka ndikuar edhe në rritjen e fitimit dhe zgjerimin e aktivitetit të sektorit privat”, tha kreu i ekzekutivit.
Ai tutje ka thënë se në vitin e kaluar për zbatimin e masës 2.2 të pakos së ringjalljes ekonomike si ekzekutiv kanë ndarë 5.5 milionë euro për bizneset mikro, të vogla dhe të mesme.
“Edhe bizneset ishin të përfshira në skemat e gjera të shpërndarjes të rritjes ekonomike në mënyrë të baraspeshuar, por edhe për t’i përkrahur në sfidat globale me të cilat po përballemi. Që nga pandemia Covid 19, te kriza globale e energjisë e tek inflacioni, vendi ynë ka treguar qëndrueshmëri dhe imunitet pavarësisht se jemi aq shumë të integruar sa që sfidat globale na bëhen edhe nacionale e lokale”, ka shtuar Kurti.
Ndërkaq, ministri i Zhvillimit Rajonal, Fikrim Damka, ka thënë se kanë arritur t’i mbështesin bizneset me makineri të reja të rrisin kapacitetet e tyre prodhuese. Ai ka thënë se që nga hapja e thirrjes, kanë qenë mbi shtatë mijë aplikime, ndërsa vlera e projektit është 6 milionë e 875 mijë euro.
“Në këtë ceremoni të rëndësishme ne po nënshkruajmë kontratat e përfituesve për Programin për Zhvillim Rajonal të Balancuar. Ky është një moment që reflekton angazhimin tonë të palëkundur për të forcuar dhe për të mbështetur çdo rajon të Republikës së Kosovës, duke bërë çdo cep të vendit tonë një vend më të mirë për të punuar dhe jetuar”, tha ai.
Sipas Damkës, Programi për Zhvillim Rajonal të Balancuar nuk është thjesht një iniciativë, por është një projekt kombëtar, që synon të përmirësojë jetën e çdo qytetari.
“Me këtë program ne po investojmë në të ardhmen e Kosovës, duke siguruar asnjë rajon të mos mbetet prapa dhe që mundësitë të jenë të barabarta për të gjithë. Kryeministri ka qenë gjithmonë mbështetës i fuqishëm i zhvillimit të qëndrueshëm dhe të balancuar të Kosovës, nën udhëheqjen e tij ne kemi punuar për të siguruar që fondet e Kosovës të përdoren në mënyrë të drejtë dhe transparente për të arritur një rezultat konkret që përmirësojnë jetën e qytetarëve tanë”, shtoi ai.
