Asamblistët e LVV-së në Kuvendin Komunal të Prishtinës kanë njoftuar se kanë dorëzuar padi në Gjykatën Supreme kundër vendimit të kryetarit të Prishtinës, Përparim Rama për rritjen e çmimit të transportit publik.
Nga asamblistët e LVV-së kërkohet se me këtë padi të anulohet vendimi dhe pezullimi i menjëhershëm i zbatimit të tij deri në vendimin përfundimtar të Gjykatës.
“Padia jonë bazohet në disa pretendime themelore:
Kryetari i Komunës nuk ka kompetencë ligjore të caktojë çmimin e biletave të transportit publik. Sipas ligjit, kjo kompetencë i takon Kuvendit Komunal.
Vendimi krijon trajtim diskriminues, duke vendosur çmime të ndryshme për të njëjtin shërbim publik, vetëm mbi bazën e mënyrës së pagesës, pa një justifikim objektiv dhe proporcional.
Vendimi është marrë në kundërshtim me parimin e ligjshmërisë, duke mos respektuar procedurat dhe standardet që kërkon legjislacioni në fuqi. Vendimi nuk përmban as arsyetimin e detyrueshëm ligjor.
Në një shtet të së drejtës, askush nuk është mbi ligjin dhe asnjë autoritet publik nuk mund të imponojë barrë financiare ndaj qytetarëve duke anashkaluar ligjin.
Tani është radha e Gjykatës Supreme të mbrojë ligjshmërinë dhe interesin public”, thuhet në njoftim
