Një shtëpi është shembur në rrugën A në Prishtinë, ngjarje që ka alarmuar Policinë e Kosovës, zjarrfikësit dhe inspektorët komunalë, të cilët kanë dalë në vendin e ngjarjes dhe kanë rrethuar zonën me shirit sigurie.
Pronarja e shtëpisë, në një deklaratë për Tëvë1, ka treguar se familja e saj ishte detyruar të largohej nga objekti rreth një vit e gjysmë më parë, pasi, sipas saj, muret kishin filluar të pësonin dëmtime si pasojë e shembjes së dheut pranë shtëpisë.
Ajo kujtoi se më 27 maj, rreth orës 22:00, ndodhi një shembje e dheut, pas së cilës në vendin e ngjarjes dolën ekipet e Drejtorisë për Emergjenca.
“Më 27 maj kemi qenë brenda në ora 10 të mbrëmjes dhe është shembur dheu. Ka ardhur Drejtoria e Emergjencave shumë shpejt dhe na kanë thënë të dalim prej këtu, sepse rrezikshmëria ishte shumë e lartë. Të nesërmen kanë ardhur dhe kanë vendosur shiritat. Ne u evakuuam dhe u detyruam të gjenim një strehim të përkohshëm, derisa të siguronim një zgjidhje afatgjatë”, tha ajo.
Pronarja pretendon se, pavarësisht konstatimeve të institucioneve dhe kërkesave për ndërprerjen e punimeve, ato kanë vazhduar.
“Përkundër konstatimit që është bërë dhe apelit që të ndalohen punimet, pas dy javësh eskavatori ka filluar sërish punën. Brenda 10 minutave ra muri i përparmë i shtëpisë dhe filluan përsëri shembjet e dheut. Punimet vazhduan pavarësisht apelit që ishte bërë”, u shpreh ajo.
Sipas saj, mbrëmjen kur ndodhi shembja e plotë e objektit, familja u njoftua nga banorët e lagjes.
“Mbrëmë u njoftuam nga banorët e lagjes se shtëpia ishte shembur krejtësisht. Kam tentuar të kontaktoj numrat ku kam telefonuar edhe më herët, por nuk kam arritur të marr përgjigje. Sot në mëngjes e vizituam vendin dhe, siç po shihet, dëmi është shumë i madh. Ne kemi jetuar këtu për 26 vjet dhe gjithçka e kemi ndërtuar me mundin tonë. Tani kërkoj vetëm një përgjigje nga Komuna se çfarë do të ndodhë me ne”, deklaroi pronarja.
Ajo kërkoi që Komuna e Prishtinës të marrë përgjegjësi për dëmet e shkaktuara dhe të ndërmarrë veprime konkrete.
“Pres që Komuna të dërgojë një ekip në terren dhe të ma kompensojë dëmin e shkaktuar. Kam qenë shumë e lumtur që nisi ndërtimi i kësaj rruge, sepse ishte e nevojshme për këtë zonë, por kurrë nuk e kam menduar se ndërtimi i saj do ta rrezikonte jetën e familjes sime me pesë anëtarë dhe do të na linte pa shtëpi”, përfundoi ajo.
