Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka bërë të ditur se mbrojtja e konsumatorëve dhe forcimi i mbikëqyrjes së tregut mbeten ndër prioritetet kryesore të ministrisë.
Kusari-Lila njoftoi se, duke filluar nga muaji gusht, numri i inspektorëve të Inspektoratit Qendror të Mbikëqyrjes së Tregut do të rritet nga 25 në 43. Synimi është që deri në fund të vitit ky numër të arrijë në 100 inspektorë.
Sipas Kusari-Lilës, rritja e kapaciteteve të inspektoratit synon të sigurojë mbrojtje më efektive për qytetarët nga manipulimet, mashtrimet dhe shkeljet në treg.
Ajo falënderoi inspektorët për angazhimin e tyre, duke theksuar se gjatë kësaj periudhe janë realizuar një sërë aksionesh, përfshirë kontrollet në tregun e derivateve të naftës, inspektimin e njehsorëve elektrikë, kontrollin e etiketimit të produkteve ushqimore, si dhe inspektimet ndaj bizneseve.
Kusari-Lila theksoi se forcimi i inspektoratit do të ndikojë në rritjen e sigurisë së konsumatorëve dhe në garantimin e një tregu më të drejtë dhe më të rregulluar.
