Shpifje e propagandë i ka quajtur ministri Hekuran Murati deklarimet e opozitarëve për prokurimin që bëhet përmes procedurave të negociuara. Shefi i financave të shtetit këtë e ka quajtur luftë ndaj Qeverisë Kurti. Ai është shfaqur shumë kritik edhe karshi Prokurorisë Speciale për çka ka thënë se nuk është e interesuar ta luftojë korrupsionin, por Albin Kurtin, për t’ia bërë një argat opozitës.
Sipas Muratit, opozitarët, kontratat me procedurë të negociuar i quajnë gabimisht, e qëllimshëm, herë kontrata njëburimore, e herë tenderë sekret.
Tha se prokurimi me procedurë të negociuar është i paraparë në Ligjin për Prokurimin Publik dhe se sipas tij, nuk ka asgjë të paligjshme kur një autoritet kontraktues përdorë këtë metodë.
“Me fjalë tjera, lloji i procedurës së prokurimit nuk e përcakton se a ka korrupsion në atë kontratë apo jo. Psh. e kemi rastin e Komunës së Prishtinës, ku me tender të hapur është dhënë kontrata në vlerë 12 milionë euro, për të paguar konsulencë e rendera në kompjuter, dhe askush nuk mund të garantojë që në këtë kontratë nuk ka korrupsion”, vijon shkrimin Murati.
Ndërkohë, si propagandë i ka quajtur shifrat për numrin e kontratave me procedurë të negociuar dhe vlerën e tyre e që thotë se ato përfshijnë të gjitha institucionet qendrore e lokale. Sipas ministrit, numri më i madh i kontratave me procedurë të negociuar ka qenë vitet 2008 e 2015, në kohën kur në pushtet ishin PDK e LDK bashkë.
Sipas ministrit Murati nëse duhet konsideruar kontratat me procedurë të negociuar si potencial për korrupsion, atëherë hetimet do të duhej të fillonin për vitet 2008 dhe 2015. Por sipas tij, Prokuroria Speciale nuk i bën ato hetime, sepse nuk është e interesuar ta luftojë krimin e korrupsionin.
“Edhe në vitin 2008, edhe në vitin 2015, në qeverisje ka qenë koalicioni PDK-LDK. Madje në vitin 2015 ka qenë ministre edhe deputetja Bajrami, e cila është aq e zellshme të ‘denoncojë’ këtë metodë të prokurimit. E nëse me të vërtetë duhet konsideruar kontratat me procedurë të negociuar si potencial për korrupsion, atëherë hetimet do duhej të fillonin pikërisht nga këto vite, 2008 dhe 2015 për të gjetur korrupsionin më të lartë. Por Prokuroria Speciale nuk i bën ato hetime, sepse Prokuroria Speciale nuk është e interesuar ta luftojë krimin e korrupsionin. Prokuroria Speciale është e interesuar ta luftojë Albin Kurtin, për t’ia bërë një argat opozitës. Kjo dëshmohet edhe në shkresat që u dërgojnë institucioneve kur kërkojnë dokumentacionin për ‘kontratat njëburimore’ (termi i përdorur nga opozita), e jo ‘kontratat me procedurë të negociuar’ siç është termi zyrtar”, ka shkruar Murati.
