A mund të mbetet pjesë e Qeverisë një ministre që flet për spastrimin etnik, deportimet dhe zhvendosjen e popullsisë? Kjo ishte pyetja që një pjesë e opozitës proevropiane ia drejtoi kryeministrit Gjuro Macut gjatë seancës disa ditore për mocionin e mosbesimit ndaj Qeverisë.
“A jeni krenar me ministren Snezhana Paunoviq, e cila deklaroi se do ta spastronte etnikisht Kosovën? A jeni krenar me Ivica Daçiqin, i cili drejton policinë duke rrahur studentë dhe qytetarë që flasin kundër këtij pushteti?”, tha Vladimir Pajiq, deputet i Lëvizjes së Qytetarëve të Lirë
Deputetë të opozitës proevropiane vlerësuan se deklarata e ministres Paunoviq dëshmon vazhdimësinë e retorikës dhe politikave të viteve ‘90. Sipas tyre, Partia Socialiste e Serbisë, në radhët e së cilës bën pjesë edhe Snezhana Paunoviq, vazhdon ta mbartë trashëgiminë politike të regjimit të Sllobodan Millosheviqit.
Deputetët kërkuan gjithashtu përgjegjësi politike dhe verifikimin e statusit të mëparshëm të punës së ministres së Administratës Shtetërore dhe Vetëqeverisjes Lokale, pas raportimeve se ajo kishte qenë drejtoreshë e institucionit të ashtuquajtur “Barnatoret e Pejës”.
“Pas deklaratës së saj kontroverse dhe nacionaliste, pyetja është se mbi çfarë baze Snezhana Paunoviq ka mundur të drejtojë një institucion që nuk ekzistonte? Kush ia paguante tatimet, kontributet dhe pagën, kur llogaria e atij personi juridik ishte mbyllur?”, tha Verica Milanoviq, deputete e partisë Serbia Qendër.
Gjatë debatit, opozita akuzoi pushtetin edhe për një sërë aferash të tjera, ndërsa kryeministrin Gjuro Macut e quajti “marionetë” të presidentit Aleksandar Vuçiq.
Opozita dhe lëvizja studentore vazhdojnë të kërkojnë zgjedhje të parakohshme parlamentare, duke vlerësuar se pushteti aktual po i dobëson institucionet, demokracinë dhe sundimin e ligjit, si dhe po e largon Serbinë gjithnjë e më shumë nga anëtarësimi në Bashkimin Evropian./rtk
