Mbyllja e pikës kryesore të shpërndarjes së ndihmës së GHF-së (Fondacioni Global Humanitar) në pjesën qendrore të Rripit të Gazës ka përkeqësuar ndjeshëm gjendjen humanitare, duke lënë mijëra palestinezë pa qasje të sigurt në ushqime dhe ndihma bazë.
Banorët e Gazës, tashmë të goditur rëndë nga lufta dhe izolimi i vazhdueshëm, mbyllja e kësaj pike shpërndarjeje i detyron ata të udhëtojnë drejt Rafah-ut në jug të Gazës – një rrugë e gjatë dhe jashtëzakonisht e rrezikshme, e monitoruar vazhdimisht nga dronët izraelitë.
Rruga për në Rafah është një udhëtim i dëshpëruar dhe i pasigurt. Shumë njerëz kthehen pa asgjë, pasi ndihmat janë të pakta dhe shpërndarja është kaotike.
Shumë familje, tashmë të rraskapitura nga muajt e konfliktit, ndihen të bllokuara. Me pak ose aspak alternativa, ato ndodhen përballë një krize akute urie dhe pasigurie ushqimore.
Zhvillimet e fundit po ngjallin shqetësime të mëdha për zhvendosje të detyruar të popullsisë. Ekspertë dhe organizata ndërkombëtare po paralajmërojnë se pengimi i qëllimshëm i aksesit në ndihma në pjesë të caktuara të territorit mund të jetë pjesë e një strategjie më të gjerë për të zhvendosur popullsinë palestineze në jug të Gazës.
Ministri izraelit i Mbrojtjes, Israel Katz, ka deklaruar më herët se qeveria izraelite synon të ndërtojë një “qytet humanitar” në vend të rrënojave të Rafah-ut, një deklaratë që është pritur me zemërim dhe refuzim nga palestinezët, të cilët e shohin këtë si një përpjekje për të imponuar zhvendosje të përhershme.
Drejtori i programit të Politikës së Jashtme në Këshillin e Lindjes së Mesme për Çështjet Globale deklaroi për Al Jazeera se, ndërsa nuk është ende e qartë se sa serioz është plani izraelit, pasi Jordania dhe Egjipti kanë refuzuar të pranojnë palestinezët, pasi besojnë se Izraeli nuk do t’i lejojë kurrë ata të kthehen në enklavë.
“Nëse ky plan është serioz, atëherë bëhet fjalë për spastrim etnik,” tha ai.
