Presidentja Vjosa Osmani, përmes platformës X, njoftoi se i ka kërkuar qeverisë të pezullojë tarifat për produktet amerikane, vendimi i cili, sipas saj, do të ishte një hap i rëndësishëm për të thelluar marrëdhëniet ekonomike me “aleatin tonë më të afërt”.
Veç kësaj, e para e shtetit tha se kështu do të dërgonim një mesazh të qartë se “Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata”.
E ky deklarim i të parës së shtetit të Kosovës po merr lëvdata në ShBA.
Pasi u vlerësua nga Kongresisti republikan amerikan, Carlos Gimenez, edhe kolegu i tij nga Teksasi, Keith Self, pati fjalë miradije për Osmanin.
“Ky është një mësim i jashtëzakonshëm në lidership për partnerët tanë evropianë që duhet ta marrin parasysh”, shkroi përfaqësuesi Self në X.
Osmani ndër të tjera tha se ndjehet e bindur se heqja e tarifave do të hapte mundësi të reja për krijimin e vendeve të punës, shkëmbimin e teknologjisë dhe rritjen ekonomike afatgjatë.
“Më shumë se një lëvizje ekonomike, ky është një objektiv i politikës së jashtme, duke riafirmuar përkushtimin tonë të qëndrueshëm ndaj aleancës Kosovë-ShBA, e ndërtuar mbi vlerat e përbashkëta të lirisë dhe dekada të mbështetjes së palëkundur”, deklaroi Osmani.
Trumpi të mërkurën nënshkroi vendimin për tarifa doganore ndaj shumicës së shteteve në botë.
Ndaj Kosovës vuri tarifë prej 10%. /kk
