Presidenti francez, Emmanuel Macron, ka hedhur poshtë idenë e çdo shitjeje ose përvetësimi të pronave të përbashkëta globale, duke deklaruar se territoret e tilla si Grenlanda, Antarktida dhe detet e hapura “nuk janë në shitje”, transmeton Anadolu.
Duke folur në hapjen e Konferencës së Oqeanit të OKB-së, të mbajtur në qytetin francez Nice, Macron i bëri këto komente me sa duket duke iu referuar interesit të shprehur shpesh nga presidenti i SHBA-së, Donald Trump, për blerjen e Grenlandës.
“Greminat (e oqeanit) nuk janë në shitje”, tha Macron, duke shtuar se as Grenlanda dhe as Antarktida nuk janë në shitje.
Komentet e presidentit Macron vijnë në prag të vizitës së tij në Grenlandë, e paralajmëruar në fund të kësaj jave, në atë që zyrtarët e kanë përshkruar si një gjest simbolik mbështetjeje për territorin autonom danez.
Pas kthimit në Zyrën Ovale në muajin janar, presidenti Trump vazhdimisht ka shprehur interes për blerjen e Grenlandës pavarësisht refuzimeve të vendosura të Danimarkës.
Grenlanda ka qenë pjesë e Danimarkës që nga shekulli i 18-të dhe iu dha sundimi i brendshëm në vitin 1979.
E vendosur midis oqeaneve Arktik dhe Atlantik, Grenlanda është e pasur me minerale dhe është një territor i vendosur strategjikisht.
Si Danimarka ashtu edhe Grenlanda kanë hedhur poshtë çdo propozim për të shitur territorin. Një sondazh i janarit zbuloi se një pjesë dërrmuese prej 85 për qind e banorëve të Grenlandës kundërshtojnë bashkimin me SHBA-në.
Në muajin mars, kryeministri i Grenlandës, Jens-Frederik Nielsen, u bëri thirrje vendeve evropiane të mbështesin territorin për të ndihmuar në sqarimin se territori “nuk është dhe nuk do të jetë kurrë në shitje”.
“Grenlanda drejtohet nga populli i Grenlandës dhe kjo nuk do të ndryshojë kurrë”, tha ai.
