Qytetarë të shumtë janë mbledhur të shtunën mbrëma në sheshin “Skënderbeu” në Prishtinë, duke vazhduar protestat kundër vendimit të Gjykatës Speciale në Hagë për dënimin e katër ish-drejtuesve të UÇK-së.
Ky është tubimi i 19-të i organizuar radhazi në shenjë kundërshtimi ndaj aktgjykimit. Protestuesit e konsiderojnë vendimin të padrejtë dhe kërkojnë ndryshime në Ligjin për Dhomat e Specializuara.
Protestuesit te ndërtesa e Kuvendit të Kosovës kanë kërkuar nga deputetët miratimin e ndryshimit dhe plotësimit të ligjit për Dhomat e Specializuara të Kosovës në Hagë.
Më 16 shtator, Gjykata Speciale dënoi Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet burgim.
Ndërkohë, Kuvendi i Kosovës do të mbajë nesër, në orën 09:00, seancë plenare ku pritet të shqyrtohet Projektligji për plotësimin dhe ndryshimin e Ligjit për Dhomat e Specializuara të Kosovës.
