Dhjetëra qytetarë protestuan para objektit të policisë në Graçanicë, pasi dyshohet se qytetari i komunitetit rom, Burhan Ibrahimoviq ishte sulmuar fizikisht nga zyrtarë policorë derisa po merrej në pyetje.
‘Ndaloni brutalitetin ndaj romëve’, ‘Ne nuk jemi thesi juaj i grushtimit’, ‘Për çfarë shërben ligji?’, ‘Shkarkim për dhunuesit’, ishin disa nga mbishkrimet në gjuhën shqipe dhe serbe që qytetarët mbanin në protestën e organizuar nga “Opre Roma Kosova”.
Nga kjo organizatë kanë thënë se nuk do të heshtin para brutalitetit.
Sipas përfaqësuesve të kësaj organizate ndaj Ibrahimoviqit është ushtruar dhunë më 19 gusht të këtij viti brenda objektit të stacionit të policisë në këtë komunë.
“Dhimbja e Burhanit është dhimbja jonë, dhe vuajtja e tij është thirrja jonë për veprim”, thanë përfaqësues te “Opre Roma Kosova”.
Ndërkohë, Inspektoriati Policor i Kosovës ka nisur hetimet për këtë rast.
