Katarina Petroviq, një oficere policie nga Valjeva, u arrestua të hënën për keqpërdorim të pozitës së saj zyrtare, dhe në fakt ajo akuzohet për zbulimin e informacionit të një rëndësie të padyshimtë publike që MPB-ja i fshehu – se kumbari i presidentit serb, Nikola Petroviq, shkaktoi një Aksident trafiku nën ndikimin e kokainës dhe alkoolit në të cilin kanë mbetur të plagosur dy femra, tregon e përjavshmja NIN në numrin e saj të fundit, transmeton KosovaPost.
Revista serbe NIN thotë se ka pasur një pasqyrë të vendimit për caktimin e masës së ndalimit policor për 48 orë, ku thuhet se për çfarë krimi akuzohet policja që e tregoi të vërtetën. Në vendimin e datës 3 qershor, thuhet se ajo ka kopjuar dokumentet që kanë të bëjnë me aksidentin e trafikut të 6 marsit 2023, në të cilin, siç saktësohet, ka marrë pjesë Nikolla Petroviq.
Më pas shtohet se ajo ia ka dorëzuar përmes rrjetit social Twitter deputetes së opozitës Marinika Tepiq, e cila e ka bërë të ditur publikisht më 18 qershor 2023. Në fakt bëhet fjalë për një dokument- vërtetim të ekspertizës, që dëshmon se kumbari i Aleksandër Vuçiqit, ka qenë nën ndikimin e kokainës dhe alkoolit kur ka shkaktuar një përplasje në Dedinje me një makinë të shtrenjtë McLaren (vlera e së cilës, pa pajisje shtesë, llogaritet në 540 mijë euro), duke shkelur rregullat e qarkullimit rrugor. Më pas ai është përplasur me dy femra, të cilat i ka plagosur rëndë.
Praktikisht, procedura të tilla nisin menjëherë, sidomos kur ka një test të menjëhershëm pozitiv për drogën dhe alkoolin, si në rastin e kumbarit të presidentit.
Meqë ra fjala, policia zakonisht publikon vetë të dhëna nëse shoferi që shkaktoi aksidentin e trafikut në të cilin pati lëndime ka dalë pozitiv për drogë dhe alkool.
Janë të shumtë shembujt kur janë publikuar të dhëna për aksidente trafiku ku janë përfshirë kritikët e qeverisë të serbisë, edhe nëse nuk ka pasur të lënduar.
Në disa raste të tilla, të dhënat janë publikuar edhe para përfundimit të hetimeve policore.
Por, policia e fshehu këtë informacion padyshim me rëndësi publike, pasi bëhet fjalë për një person të afërt të përfaqësuesit më të lartë të qeverisë serbe.
Akoma më e dyshimtë është se policia e Vuçiqit e ka vonuar ngritjen e kallëzimit penal kundër kumbarit të presidentit të Serbisë.
