Në ligjëratën me temë “Identiteti në mërgim – Sfidat e jetës në Perëndim”, hoxha Shefqet Krasniqi trajtoi çështjen e ruajtjes së identitetit fetar dhe kombëtar të shqiptarëve që jetojnë jashtë vendit. Ai e lidhi rritjen e pranisë së muslimanëve në Evropë me valët e migrimit të shkaktuara nga luftërat, varfëria dhe represioni politik në vende të ndryshme të botës, duke theksuar se komuniteti musliman në kontinent është zgjeruar ndjeshëm gjatë dekadave të fundit.
Sipas tij, jeta në Perëndim i vendos besimtarët përballë një sërë sfidash që shkojnë përtej përshtatjes me gjuhën dhe kulturën e vendit pritës. Ai veçoi veçanërisht çështjet që lidhen me ruajtjen e praktikës fetare, integrimin në shoqëri dhe zgjedhjen e formave të punësimit që, sipas bindjeve islame, konsiderohen të lejueshme.
Duke folur për raportin ndërmjet fesë dhe kombit, Krasniqi kundërshtoi idenë se këto dy identitete janë në konflikt me njëri-tjetrin. Ai argumentoi se besimi fetar nuk e përjashton atdhedashurinë dhe se një mysliman mund të jetë njëkohësisht i përkushtuar ndaj fesë dhe ndaj vendit të tij. Megjithatë, ai nënvizoi se në hierarkinë e bindjeve personale, identiteti fetar zë vendin parësor, duke e konsideruar atë pikën kryesore të orientimit të tij.
