Ngarkesa me fruta si pjeshka e kumbulla nga Serbia, janë kthyer prapa nga Kroacia e Sllovenia. Këto dy shtete kanë deklaruar se pemët e perimet nga Serbia, kanë nivele të larta të pesticideve, të dëmshme për organizimin e njeriut. Ndërkohë, Kosova është importuese në shifra të larta të produkteve serbe. Zyrtarët përkatës deklarojnë se shteti ynë nuk importon pemë e perime nga shteti serb.
Ditë më parë, Kroacia e Sllovenia bllokuan importin e frutave nga Serbia. Kjo për shkak të konstatimit se ato kanë nivel të lartë të pesticideve, të dëmshme për organizimin e njeriut.
Ndërkohë, Kosova importon produkte të tjera nga Serbia, në shifra të larta. Dyshime për sigurinë e produkteve që konsumojnë, ngrenë edhe konsumatorët.
Nga Agjencia e Ushqimit dhe Veterinarisë shpjegojnë për RTK-në, se gjatë këtij viti nuk kanë vërejtur prani të pesticideve në pemët dhe perimet që shiten në tregun vendor.
Mirëpo, shitësit thonë se s’kanë dëshmi se prodhimet që i marrin nga jashtë janë të kontrolluara.
Ndërsa, nga organizata për mbrojtjen e konsumatorëve dyshojnë se ka produkte që hyjnë në Kosovë edhe pa iu nënshtruar kontrolleve.
Në mënyrë që shëndeti të mos u rrezikohet nga pesticidet, qytetarëve u rekomandohet që para konsumimit, t’i pastrojnë sa më mirë frutat e perimet.
