Fermerët e Komunës së Podujevës do të kenë mundësi të aplikojnë edhe për 10 ditë të tjera për Programin e Pagesave Direkte, pasi afati është shtyrë deri më 31 korrik 2026.
Sipas njoftimit të Komunës së Podujevës, aplikimi mund të bëhet në objektin e vjetër të administratës komunale, në zyrën numër 31. Gjatë kësaj periudhe, fermerët do të mund të aplikojnë edhe të shtunave, nga ora 08:00 deri në 16:00.
Përmes këtij programi, fermerët mund të përfitojnë mbështetje në disa fusha, përfshirë:
- Pagesat bazë për të ardhurat nga sipërfaqet e pranueshme bujqësore;
- Pagesat rishpërndarëse për fermat e vogla dhe të mesme, si dhe fermerët e rinj;
- Pagesat e lidhura me prodhimin dhe cilësinë për sektorët prioritarë të bujqësisë;
- Eko-skemat për prodhimin organik dhe praktikat e qëndrueshme bujqësore.
Komuna ka bërë të ditur se gjatë aplikimit fermerët duhet të deklarojnë sipas gjendjes reale në fermë të gjitha sipërfaqet, kulturat bujqësore, kafshët, kosheret dhe prodhimin.
Ndërkaq, blegtorët duhet të sigurohen që kafshët janë të identifikuara dhe të regjistruara në përputhje me kërkesat ligjore.
Për informata shtesë, fermerët mund t’i drejtohen Drejtorisë për Bujqësi të Komunës së Podujevës ose të informohen përmes kanaleve zyrtare të Ministrisë së Bujqësisë dhe Agjencisë për Zhvillimin e Bujqësisë./
