Ministri në detyrë i Punëve të Brendshme, Xhelal Sveçla, pas vendimit për shpalljen person të padëshirueshëm të shefit të Telekomit të Serbisë, Vladimir Luçiq, ka thënë se askush nuk mund të hyjë në territorin e Republikës së Kosovës dhe të veprojë apo të deklarohet kundër rendit kushtetues, sovranitetit dhe integritetit territorial, përcell KosovaPost.
“Askush nuk mund të hyjë në territorin e Republikës së Kosovës dhe nga këtu, të veprojë apo të deklarohet kundër rendit tonë kushtetues, sovranitetit dhe integritetit territorial. Nuk do të tolerojmë promovimin apo mbështetjen e politikave që cenojnë autoritetin e institucioneve tona dhe vënë në pikëpyetje shtetësinë e Republikës së Kosovës”, ka shkruar Sveçla.
Ai ka thënë se bazuar në deklaratat publike të shefit të Telekomit të Serbisë, Vladimir Luçiq, ka marrë vendim që ai të shpallet person i padëshirueshëm në Kosovë.
“Për këtë arsye, bazuar në deklaratat publike të shefit të Telekomit të Serbisë, Vladimir Luçiq, kam marrë vendim që ai të shpallet person i padëshirueshëm (non grata) në Republikën e Kosovës, me ndalim të përhershëm të hyrjes, qëndrimit dhe kalimit transit në territorin e Republikës së Kosovës”, ka shkruar Sveçla.
Sveçla ka bashkëngjitur në postim edhe vendimin.
“Republika e Kosovës është shtet i pavarur dhe sovran. Institucionet tona do të vazhdojnë të mbrojnë me vendosmëri rendin kushtetues, sovranitetin dhe integritetin territorial të vendit”, ka shkruar ai.
