Arabia Saudite është shumë serioze për Vinicius Júnior dhe po i afrohet gjithnjë e më shumë lojtarit. Braziliani është në dijeni të të gjitha lëvizjeve që nga dita e parë e negociatave, të cilat filluan të formoheshin në vitin 2023 dhe vazhdojnë ende.
Sipas informacioneve të ‘Radio MARCA’, në takimin e parë të atij viti, Vinicius ishte protagonist direkt. Ai u ul personalisht me përfaqësues të Arabisë Saudite për të dëgjuar projektin që do t’i ofronin, në një bisedë të qetë prej rreth 15 minutash, ku ‘7’-a i Real Madridit tregoi interes jo vetëm për aspektin ekonomik, por edhe për atë sportiv dhe personal.
Në këtë takim fillestar morën pjesë figura të rëndësishme nga rrethi i sulmuesit, ndërmjetës dhe personalitete me peshë të madhe nga familja mbretërore e Arabisë Saudite, përmes një videokonference. Objektivi ishte bindja e ‘Vini’-t me një të ardhme premtuese, jo vetëm në aspektin financiar. Përveç marrëveshjeve tregtare fitimprurëse, sauditët e kanë joshur me ofertën për t’u bërë “ambasador” i Kupës së Botës 2034, që do të zhvillohet në Arabinë Saudite.
Takimi në Pragë dhe shifra marramendëse
Shifrat ekonomike u diskutuan në një takim të dytë më formal, në një vend të sigurt: Pragë. Në kryeqytetin çek, larg syve të medieve dhe në një territor neutral, agjentët e Vinicius u takuan personalisht me zëvendëspresidentin e Saudi Pro League, Saad Al Lazeez.
Në tryezë u vendos një ofertë e pabesueshme: 1 miliard euro për pesë sezone, pra 200 milionë euro pagë vjetore. Ende nuk është përcaktuar se cili klub do ta marrë atë, por nga Arabia sugjerohet se do të luajë në Jeddah. Megjithatë, situata mund të ndryshojë nëse Neymar largohet përfundimisht, duke krijuar hapësirë për një destinacion tjetër.
Oferta që konsiderohet “e parefuzueshme”
Nga njerëzit pranë Viniciusit e konsiderojnë këtë ofertë si të pashembullt dhe të parefuzueshme dhe e kanë bërë të qartë për sulmuesin se sauditët janë shumë seriozë në qëllimin e tyre. Shifrat marramendëse dhe projekti i ofruar kanë bërë që futbollisti të fillojë të mendojë për të ardhmen e tij.
Më shumë se një vit e gjysmë pas kontaktit të parë me ofertën miliardere, lidhjet mes Arabisë Saudite dhe lojtarit mbeten shumë të forta. Madje, tri javë më parë, agjenti i tij udhëtoi në Arabinë Saudite për bisedime të mëtejshme.
Dilema e madhe e Vinicius
Shqetësimi më i madh i Vinicius-it, në rast të largimit nga Spanja drejt një lige ende në zhvillim, është imazhi i tij. Nëse vendos të largohet, nuk dëshiron të shihet si një lojtar që u largua vetëm për para. Rrethi i tij është i vetëdijshëm për këtë dhe po punon që, nëse ndodh transferimi, statusi i tij si një legjendë e Real Madridit të mos dëmtohet shumë.
Për më tepër, Vinicius është ndier i keqtrajtuar në disa periudha që nga ardhja e tij në Spanjë, sidomos për shkak të episodeve të urrejtjes dhe racizmit në stadiumet e La Liga-s. Një pjesë e stafit të tij beson se ai duhet të flasë hapur për pakënaqësitë e tij në një ligë ku këto probleme vazhdojnë të ndodhin.
Vendimi final mbetet në duart e lojtarit
Deri më tani, Vinicius nuk ka marrë ende një vendim përfundimtar për të ardhmen e tij. Ai mbetet i përqendruar te sezoni me Real Madridin, por është i vetëdijshëm se negociatat që nisën dy vite më parë tani kanë arritur në një pikë kritike. Arabia Saudite dëshiron ta transferojë atë këtë verë, dhe lojtari duhet të vendosë.S.N.
