Presidenti Volodymyr Zelensky ka nënshkruar të shtunën një ligj që ndalon predikimet e grupeve fetare që kanë lidhje me Rusinë.
Objektivi kryesor i projektligjit është Kisha Ortodokse e Ukrainës (UOC) e cila historikisht ka qenë e lidhur me Kishën Ortodokse Ruse, e njohur gjithashtu si Patriarkana e Moskës.
Zelensky iu referua projektligjit në fjalimin e tij të natës, duke thënë se “ortodoksia ukrainase sot po bën një hap drejt çlirimit nga djajtë e Moskës”.
Ligji i ri i jep UOC dhe grupeve të tjera fetare nëntë muaj për të ndërprerë lidhjet me Rusinë ose rrezikojnë mbylljen me urdhër të gjykatës.
Ligji u miratua në parlamentin e Ukrainës më 20 gusht, me 265 ligjvënës që votuan pro dhe 29 kundër.
Ndërsa UOC pretendon se ka ndërprerë lidhjet me Kishën Ortodokse Ruse në vitin 2022, Shërbimi Shtetëror i Ukrainës për Politikat Etnike dhe Lirinë e Ndërgjegjes thotë se lidhjet janë ende të paprekura dhe kisha mbetet në orbitën e Moskës.
Shërbimi i Sigurisë së Ukrainës (SBU) ka akuzuar UOC për përhapjen e propagandës pro-Moskës.
Që nga fillimi i agresionit rus, SBU ka hapur procedim penal kundër më shumë se 100 klerikëve të UOC.
Gati 50 tashmë janë akuzuar dhe 26 janë dënuar, sipas kësaj strukture.
