Mjekët ukrainas kanë filluar procedurat për të hequr një shenjë djegieje që shkruan “Lavdi Rusisë” nga trupi i një ushtari ukrainas të liruar së fundmi.
Aktualisht po përgatitet një ndërhyrje më agresive për ta larguar shenjën, ka njoftuar drejtori ekzekutiv i Neopalymi, Maksym Turkevych, që njihet për programin e rehabilitimit, transmeton Telegrafi.
Turkevych i tha Ukrainska Pravda se ushtari i quajtur Andrii, është rreth 40 vjeç. Ai u plagos dhe u kap rob më shumë se 15 muaj më parë. Shenja e djegies iu shkaktua nga një kirurg rus.
“Kjo u krye nën anestezi të përgjithshme duke përdorur një elektrokoagulator, një pajisje e përdorur në kirurgjinë moderne për të hequr tumoret, lythat, etj. Procedura nuk u krye për qëllim torture, por për të lënë një shenjë. Me shumë mundësi është kryer nga një mjek me përvojë, duke pasur parasysh mbishkrimin relativisht të barabartë dhe ngjashmëritë me shenjat e tjera. Ne kemi informacion se kush mund të ketë qenë kirurgu. Aktualisht po kontrollohet nga autoritetet kompetente shtetërore”, shtoi Turkevych.
Andrii ka qenë në spital që nga lirimi i tij nga robëria. Mjekët aktualisht po administrojnë injeksione polinukleotidesh për të zbutur indin e mbresë dhe për ta përgatitur atë për trajtim të mëtejshëm. Efektiviteti i trajtimit të përgjithshëm do të varet kryesisht nga ky kujdes fillestar.
“Kjo procedurë ka shumë të ngjarë të jetë e dhimbshme dhe e pakëndshme. Kryhet nën anestezi lokale dhe në raste të rralla nën anestezi të përgjithshme. Shenjat e Andriit janë keloide dhe absolutisht nuk mund të operohen. Kirurgjia do t’i bënte ato të rriteshin përsëri. Kjo është arsyeja pse protokolli i trajtimit është gjithmonë kompleks, hibrid dhe i përshtatur për pacientin”, shtoi Turkevych.
Gjithashtu theksoi se gjurmët e shenjave do të mbeten patjetër. Megjithatë, është e vështirë të parashikohet se si do të jenë ose sa shpejt do të zbehen, pasi kjo varet kryesisht nga karakteristikat individuale anatomike.
“Do të kemi një kuptim më të qartë pas trajtimeve të para me laser. Hipoteza jonë është se do të kemi një rezultat të prekshëm në rreth gjashtë muaj”, shtoi Turkevych./KosovaNews
